މިދިޔަ އަހަރު 163 ދިވެހިން ބިދޭސީންނާ ކައިވެނިކޮށްފައިވާ ކަމަށް ފެމިލީ ކޯޓުން ބުނެފިއެވެ.

ފެމިލީ ކޯޓުން އާއްމުކުރި ތަފާސް ހިސާބުތަކުން ދައްކާގޮތުން މިދިޔަ އަހަރު ބިދޭސީންނާ ކުރެވުނު 163 ކައިވެނީގެ ތެރެއިން، 45 ކައިވެންޏަކީ ބިދޭސީ ފިރިހެނުންނާއި ދިވެހި އަންހެނުން ކުރި ކައިވެނިތަކެވެ.

އަދި އަނެއް ކައިވެންޏަކީ 118 ބިދޭސީ އަންހެނުންނާއި ދިވެހި ފިރިހެނުން ކުރި ކައިވެނި ކަމަށް ފެމިލީ ކޯޓުގެ ހިސާބުތަކުން ދައްކައެވެ.

މީގެ އިތުރުން 2024 ވަނަ އަހަރު ފެމިލީ ކޯޓުން 2485 ކައިވެނިކޮށްދީފައިވާއިރު، އެ އަހަރު ތެރޭގައި 1326 ވަރިކޮށްފައިވާކަމަށްވެސް ފެމިލީ ކޯޓުގެ ހިސާބުތަކުގައި ބުނެފައިވެއެވެ. އަދި ރާއްޖެއިން ބޭރުގައި ކޮށްފައިވާ 181 ކައިވެނި ވަނީ ރެޖިސްޓަރ ކޮށްދީފައެވެ.

ފެމިލީ ކޯޓު މެދުވެރިކޮށް މިދިޔަ އަހަރު 97 މިލިއަނަށްވުރެ ގިނަ ފައިސާ ދެއްކުމަށް ސާބިތުކޮށްފައިވާއިރު، މި ފައިސާގެ ތެރޭގައި އަނބިދަރިންގެ ހަރަދާއި، އިއްދައިގެ ހަރަދާއި، ވިހެއުމުގެ ހަރަދު އަދި ކައިވެނީގެ ރަނުގެ ހަރަދު ހިމެނެއެވެ.

ހަމަ އެހެންމެ މިދިޔަ އަހަރު އެކި މައްސަލަތަކާ ގުޅިގެން 46.8 މިލިއަން ރުފިޔާ ކޯޓަށް ބަލައިގަނެފައިވެއެވެ. އަދި 2023 ވަނަ އަހަރު ރައްދު ނުކުރެވި ހުރި ފައިސާއާއެކު 47.5 މިލިއަން ރުފިޔާ ރައްދުކޮށްދީފައިވެއެވެ