މަސްތުވާތަކެތީގެ ވިޔަފާރިކުރިކަން ސާބިތުވެ އުމުރުދުވަހުގެ ޖަލު ހުކުމެއް ތަންފީޒުކުރަމުންދިޔަ އަބްދުﷲ އިބްރާހިމް (އަބުޗާ) ޕެރޯލްގެ ދަށުން މިނިވަން ކުރި ކުރުން ބަދަލުކޮށް އަލުން އޭނާ މިއަދު ހައްޔަރުކޮށްފި އެވެ.
އެކަން ހާމަކުރީ ހޯމް މިނިސްޓަރު އަލީ އިހްސާން މިއަދު ބޭއްވެވި ނޫސްވެރީންގެ ބައްދަލްވުމުގަ އެވެ. އެ މައްސަލައިގެ މައުލޫމާތު ހާމަކުރުމަށް ހާާއްސަކޮށް ބޭއްވި ނޫސްވެރީންގެ ބައްދަލްވުމުގައި މިނިސްޓަރު އިހްސާން ވިދާޅުވީ ޕެރޯލް ބޯޑްގެ އެ ނިންމުން ސަމާލު ކަަމަށް އައުމާއެކު އެ ނިންމުން އަލުން މުރާޖައާ ކުރުމަށް މިއަދުގެ ވަގުތެއްގައި ޕެރޯލް ބޯޑަށް އަންގާފައިވާ ކަމަށެވެ.
އަދި ޕެރޯލް ބޯޑުގެ ނިންމުން ބަދަލުކޮށްފައިވާ ކަމަށް ވިދާޅުވި އެވެ. ކޮމިޝަނަރު އޮފް ޕޮލިސް އާއި ކޮމިޝަނަރު އޮފް ޕްރިޒަންސް ވެސް ބައިވެރިވެވަޑައިގެންނެވި މި ބައްދަލްވުމުގައި މިނިސްޓަރު އިހްސާން ވިދާޅުވީ ފެރޯލް ބޯޑްގެ ނިންމުން ބަދަލު ކުރުމާއެކު މިއަދު ހަވީރު 4:48 ގައި އަބުޗާ އަލުން ހައްޔަރުކޮށްފައިވާ ކަމަށެވެ.
ޕެރޯލް ބޯޑްގެ ނިންމުން ނިންމީ އެ ބޯޑުން ބަލަން ޖެހޭ ކަންކަން ބެލުމަށް ފަހުގައި ނަމަވެސް މަސްތުވާތަކެތީގެ ވިޔަފާރިކުރާ މީހުންނަށް މި ސަރުކާރުން ގެންގުޅޭ ހަރުކަށި ސިޔާސަތާއި އެ ނިންމުން ފުށުއަރާ ކަމުގައި މިނިސްޓަރު ވިދާޅުވި އެވެ. ނިންމުން ބަދަލު ކުރަން އެންގީ އެހެންވެގެން ކަމުގައި ވިދާޅުވި އެވެ.
"މަސްތުވާތަކެތީގެ ވިޔަފާރިކުރާ މީހުންނަކީ އެ ފަރާތްތަކާއި ދޭތެރޭގައި ޤާނޫނުގައި އޮންނަ އެންމެ ހަރުކަށިކޮށް ދެކޭ ފަރާތްތައް. އެހެން ކަމުން އެފަދަ ފަރާތްތަކަށް ލުޔެއްދޭން އަދުގެ ސަރުކާރުން އެއްވެސް ކަމެއް ނުކުރާނެ،" މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ އެފަދަ ނިންމުމެއް ޕެރޯލް ބޯޑުން ނިންމުމާއި ގުޅިގެން މުޅި ބޯޑްގެ ހުރިހާ މެންބަރުން މިހާރު ވަކިކޮށްފައިވާ ކަމަށެވެ. ހަ މެންބަރުންގެ މައްޗަށް އެކުލެވޭ ބޯޑް އަލުން އެކުވާލުމުގެ މަސައްކަތް ކުރަމުންދާ ކަމަށްވެސް ވިދާޅުވި އެވެ.
ބޯޑްގައި ފުލުހުންގެ އަދި ކަރެކްޝަންގެ އިސް ބޭފުޅަކު ވެސް ހިމެނިވަޑަައިގަންނަވާތީ އެ ބޯޑްގެ ނިންމުމަކީ ގަސްތުގައި ގޯސްކޮށް ނިންމާފައިވާ ނިންމުމެއްނަމަ އެކަމާއި ގުޅިގެން ފިޔަވަޅު އަޅާނެ ކަމަށްވެސް މިނިސްޓަރު ވިދާޅުވި އެވެ.
އަބްޗާ އަކީ އައްޑުއަށް ޑްރަގް އެތެރެކޮށް އޭގެ ވިޔަފާރި އެންމެ ވަރުގަދައަށް ކުރާ މީހުންގެ ތެރޭގައި ހިމެނޭ ކަމަށް ފުލުހުން ތުހުމަތުކުރާ މީހެކެވެ. އޭނާ މިނިވަން ކުރުން ކުށްވެރިކޮށް އެތައް ބަޔަކު ދިޔައީ ފާޑުކިޔަމުންނެވެ.
Advertisement
This content is created and paid for by advertisers and does not involve Voice Journalists
