މޯލްޑިވްސް މާކެޓިން ޕީއާރު ކޯޕަރޭޝަން، އެމްއެމްޕީއާރުސީ ހިޔާނާތުގެ މައްސަލާގައި ކުށް ސާބިތުވި ފަރާތްތަކާއެކު ދައުލަތުން ހަދާފައިއޮތް ހުރިހާ އިމިއުނިޓީ އެއްބަސްވުންތަކެއް ބާތިލްކޮށްފިއެވެ.
އެމްއެމްޕީއާރުސީ މައްސަލާގައި ދައުލަތުން ލުއިދިނުމަށް އެއްބަސްވުންތަކެއް ހަދާފައިވަނީ، ކުރީގެ ނައިބުރައީސް އަހުމަދު އަދީބުގެ އިތުރުން އެސްއޯއެފްގެ ވެރިންގެ މައްޗަށެވެ. މި މައްސަލާގައި މީގެ ކުރިން އެމްއެމްޕީއާރުސީގެ މެނޭޖިންގ ޑިރެކްޓަރުގެ މަގާމުގައި ކުރިން ހުންނެވި ޒިޔަތާއެކު ހެދި އެއްބަސްވުން ވަނީ 2022 ވަނަ އަހަރު ނިމުމަކަށް ގެނެސްފައެވެ.
މިހާތަނަށް ލުއިދިނުމުގެ އެއްބަސްވުން ދެމިއޮތީ:
- އަހުމަދު އަދީބް
- މުހައްމަދު އައްލާމް ލަތީފް
- މުހައްމަދު ހުސައިން (އޮއިއްޓޭ)
- އިޝްފާޙް ޢަލީ
އެމްއެމްޕީއާރުސީ މައްސަލާގައި މި ފަރާތްތަކާއެކު ލުއިދިނުމުގެ އެއްބަސްވުން ޤާއިމްކޮށްފައިވަނީ، ހިޔާނާތުގެ މައްސަލަ ކުރިއަށްގެންދިއުމަށް ދައުލަތުން އެއްބާރުލުން ހޯދުމުގެ އިތުރުން ގެއްލިފައިވާ ފައިސާ ހޯދުމަށެވެ. ދައުލަތުން އެ އެއްބަސްވުންތައް ބާތިލްކުރި ސަބަބެއްކަމަށް ޕްރޮސެކިއުޓަރ ޖެނެރަލްގެ އޮފީހުން ބުނީ، އެފަރާތްތަކާއެކު އެއްބަސްވުންތައް ޤާއިމްކޮށް ލުއިތައްދިން ނަމަވެސް ދައުލަތަށް ލިބެންޖެހޭ އެއްބާރުލުން ނުލިބުމެވެ.
މި މައްސަލާގައިޕްރޮސެކިއުޓަރ ޖެނެރަލްގެ އޮފީހުން ވަނީ މޯލްޑިވްސް ޕޮލިސް ސާވިސް އާއި އެންޓިކޮރަޕްޝަން ކޮމިޝަނަށް އެފަރާތްތަކުގެ މައްސަލަތައް ތަހުގީގު ކުރިއަށްގެންގޮސް ޕީޖީއަށް މައްސަލަ ހުށަހެޅުމަށް އެދިފައެވެ.
އެމްއެމްޕީއާރުސީ ހިޔާނާތަކީ މި ފަހުގެ ތާރީހެއްގައި ސަރުކާރުގެ ތެރޭގައި ހިނގާދިޔަ މިފަދަ އެންމެބޮޑު ހާދިސާއެވެ. އެމްއެމްޕީއާރުސީ ހިޔާނާތް 4 ބިލިއަން ރުފިޔާއަށް އަރާއިރު، އެ މައްސަލާގައި އެސްއޯއެފް މެދުވެރިކޮށް ވަނީ އެތައް މިލިއަން ޑޮލަރެއްގެ މުއާމަލާތް ހިންގާފައެވެ. މި މައްސަލާގައި ހިމެނޭ އެސްއޯއެފަށް ނިސްބަތްވާ މީހުން މިހާރު ދިރިއުޅެނީ ރާއްޖެއިން ބޭރުގައެވެ.
Advertisement
This content is created and paid for by advertisers and does not involve Voice Journalists
