ކޮރަޕްޝަން ނައްތާލެވޭނީ ހިޔާނާތުގައި ބައިވެރިވާ އެންމެނަށް ޤާނޫނާ އެއްގޮތްވާ ގޮތުގެމަތިން ހަމަހަމަކަމާއެކު އަމަލުކުރެވިގެންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ޕްރޮސެކިއުޓަރ ޖެނެރަލްގެ އޮފީހުން މިއަދު ވަނީ އެމްއެމްޕީއާރުސީގެ ހިޔާނާތުގެ މައްސަލާގައި ކުށް ސާބިތުވި ފަރާތްތަކާއެކު ދައުލަތުން ހަދާފައިއޮތް ހުރިހާ އިމިއުނިޓީ އެއްބަސްވުންތަކެއް ބާތިލްކޮށްފައެވެ. މި އެއްބަސްވުންތައް ޤާއިމްކޮށްފައިވަނީ މިދިޔަ ސަރުކާރުގެ ދުވަސްވަރުއެވެ.
މިކަމާ ގުޅިގެން އެކްސްގައި މިރޭ ކުރެއްވި ޕޯސްޓެއްގައި ރައީސް ޑރ.މުއިއްޒު ވިދާޅުވީ، އެމްއެމްޕީއާރްސީގެ ޚިޔާނާތުގެ ބޮޑު މައްސަލައިގައި ބައެއް ފަރާތްތަކަށް ތަފާތު އިމްތިއާޒްތަކެއް ލިބިދީ އެމީހުންގެ މައްޗަށް އިތުރު ދަޢުވާ ނުކުރުމަށް އެއެްބަސްވެ ކުރީގެ ޕްރޮސިކިއުޓަރ ޖެނެރެލް ހައްދަވާފައިވާ އެއްބަސްވުންތައް ބާޠިލް ކުރައްވާފައިވާތީވެ، އެކަމާ މަރުހަބާ ވިދާޅުވެފައެވެ. ރައީސް ވިދާޅުވީ، ޒަމާނުއްސުރެން މިޤައުމަށް ކުރިމަތިވެފައިވާ ކޮރަޕްޝަންގެ ވަބާ މިޤައުމުން ނައްތާލެވޭނީ އެފަދަ މައްސަލަތަކުގައި ހިމެނޭކަމަށް ތުހުމަތުކުރެވޭ ހުރިހާ ފަރާތަކާމެދުވެސް ޤާނޫނާ އެއްގޮތްވާ ގޮތުގެމަތިން ހަމަހަމަކަމާއެކު ޢަމަލުކުރެވިގެން ކަމަށެވެ.
އެމްއެމްޕީއާރުސީ މައްސަލާގައި ދައުލަތުން ލުއިދިނުމަށް އެއްބަސްވުންތަކެއް ހަދާފައިވަނީ، ކުރީގެ ނައިބުރައީސް އަހުމަދު އަދީބުގެ އިތުރުން އެސްއޯއެފްގެ ވެރިންގެ މައްޗަށެވެ. މީގެ ތެރޭގައި ހިމެނެނީ:
އަހުމަދު އަދީބް
- މުހައްމަދު އައްލާމް ލަތީފް
- މުހައްމަދު ހުސައިން (އޮއިއްޓޭ)
- އިޝްފާޙް ޢަލީ
އެމްއެމްޕީއާރުސީ މައްސަލާގައި ދައުލަތުން ލުއިދިން މީހުންގެ ތެރެއިން ކުރީގެ އެމްއެމްޕީއާރުސީގެ މެނޭޖިންގ ޑިރެކްޓަރު އިބްރާހިމް ޒިޔަތާ އެކު ހަދާފައިވާ އެއްބަސްވުން ވަނީ 2022 ވަނަ އހަަރު ބާތިލްކޮށްފައެވެ.
އެމްއެމްޕީއާރުސީ މައްސަލާގައި އެ ފަރާތްތަކާއެކު ލުއިދިނުމުގެ އެއްބަސްވުން ޤާއިމްކޮށްފައިވަނީ، ހިޔާނާތުގެ މައްސަލަ ކުރިއަށްގެންދިއުމަށް ދައުލަތުން އެއްބާރުލުން ހޯދުމުގެ އިތުރުން ގެއްލިފައިވާ ފައިސާ ހޯދުމަށެވެ. ދައުލަތުން އެ އެއްބަސްވުންތައް ބާތިލްކުރި ސަބަބެއްކަމަށް ޕްރޮސެކިއުޓަރ ޖެނެރަލްގެ އޮފީހުން ބުނީ، އެފަރާތްތަކާއެކު އެއްބަސްވުންތައް ޤާއިމްކޮށް ލުއިތައްދިން ނަމަވެސް ދައުލަތަށް ލިބެންޖެހޭ އެއްބާރުލުން ނުލިބުމެވެ.
މި މައްސަލާގައިޕްރޮސެކިއުޓަރ ޖެނެރަލްގެ އޮފީހުން ވަނީ މޯލްޑިވްސް ޕޮލިސް ސާވިސް އާއި އެންޓިކޮރަޕްޝަން ކޮމިޝަނަށް އެފަރާތްތަކުގެ މައްސަލަތައް ތަހުގީގު ކުރިއަށްގެންގޮސް ޕީޖީއަށް މައްސަލަ ހުށަހެޅުމަށް އެދިފައެވެ.
އެމްއެމްޕީއާރުސީގެ ހިޔާނާތުގެ މައްސަލާގައި ކުށް ސާބިތުވި ފަރާތްތަކާއެކު ދައުލަތުން ހަދާފައިއޮތް ހުރިހާ އިމިއުނިޓީ އެއްބަސްވުންތައް ބާތިލްކުރުމުން ރައީސް ޑރ.މުއިއްޒު މަރުހަބާ ވިދާޅުވެފައިވާއިރު، މިދިޔަ އަހަރު ބޭއްވި ޖަލްސާއެއްގައި ވާހަކަދައްކަވަމުން އެމަނިކުފާނު ވަނީ އެމްއެމްޕީއާރުސީގެ ތެރެއިން ވައްކަން ކުރި ފަރާތްތައް ދެނެގަނެ އެއީ ކޮންމެ މީހެއް ކަމުގައިވިޔަސް ޙައްގު އަދަބުދީ، އެ ފައިސާ އަނބުރާ ހޯދުމަށް ކުރަން ޖެހުނު ކޮންމެ ކަމެއް ކުރައްވާނޭކަމަށް ވިދާޅުވެފައެވެ.
އެ ވައްކަން ކުރި ފަރާތްތައް ދެނެގަނެ އެއީ ކޮންމެ މީހެއް ކަމުގައި ވިޔަސް، އެ މީހަކަށް ދޭން ޖެހޭ ހައްގު އަދަބު މި ސަރުކާރުން ދީ، އެ ފައިސާ ރައްޔިތުންނަށް ހޯދަން ކުރަން ޖެހުނު ކޮންމެ ކަމެއް ކުރާނަން. އެއީ ރައްޔިތުންގެ މުދާ، އެއީ ރައްޔިތުންގެ ފައިސާ. އެ ފައިސާ ހޯދައި މިދެންނެވި އެސެޓް ރިކަރަވަރީ ޤާނޫނު ތައާރަފުކޮށް އަދި ދެންވެސް އެކިއެކި ވައްކަންތަކުގައި ރައްޔިތުންގެ އަތުން ގެންގޮސްފައިވާ އެކިކަހަލަ މުދާތައް އަނބުރާ ހޯދުމަކީ އަޅުގަނޑުމެން ކުރާނެ ކަމެއް
މިދިޔަ އަހަރުގެ ޖުލައިމަހުގެ 7 ވަނަ ދުވަހުގެ ރޭ ޕީއެންސީގެ ހަރުގެ ޖަލްސާގައި ވާހަކަދައްކަވަމުން ރައީސް ވިދާޅުވިއެވެ
ރައީސް ވިދާޅުވީ އެކަމުގައި ބައިވެރިވި މީހެއްކަން ސާބިތުކުރެވެން ޖެހޭނީ އިންސާފުވެރިކަމާ އެކުގައި ކަމަށެވެ.
Advertisement
This content is created and paid for by advertisers and does not involve Voice Journalists
