އެމެރިކާގެ ރައީސްކަމުގެ އައު ދައުރަކާ ޑޮނާލްޑް ޓްރަމްޕް ހަވާލުވެވަޑައިގެންފިއެވެ.

އެމެރިކާގެ 47 ވަނަ ރައީސްކަމުގެ މަޤާމާ ޓްރަމްޕް މިރޭ ހަވާލުވެވަޑައިގެންނެވިއިރު، މިއީ އެމެރިކާގެ ރިޔާސަތާ ޓްރަމްޕް ހަވާލުވެ ވަޑައިގަންނަވާ ދެވަނަ ފަހަރެވެ. މީގެކުރިން އެމެރިކާގެ ރައީސްކަމުގެ މަޤާމު ޓްރަމްޕް އަދާކުރެއްވީ، 2017 ވަނަ އަހަރުގެ ޖެނުއަރީމަހުގެ 20 ވަނަ ދުވަހުން ފެށިގެން 2021 ވަނަ އަހަރުގެ ޖެނުއަރީމަހުގެ 20 ވަނަ ދުވަހުގެ ނިޔަލަށެވެ.

ޓްރަމްޕް މިފަހަރުގެ ރިޔާސީ އިންތިހާބު ކާމިޔާބު ކުރައްވާފައިމިވަނީ، 2020 ވަނަ އަހަރު ރިޔާސީ ރޭހަށް ނިކުމެ ވަޑައިގެން ކުރިމަތިވި ނާކާމިޔާބީއަށްފަހުއެވެ. ރިޕަބްލިކަން ޕާޓީގެ ރިޔާސީ ކެންޑިޑޭޓެއްގައި ރިޔާސީ ރޭހަށް މިފަހަރު ނިކުމެވަޑައިގެން ޑޮނަލްޑް ޓްރަމްޕް، ވަނީ ޕެންސިލްވޭނިއާ، ނޯތު ކެރޮލައިނާ އަދި ޖޯޖިއާ ފަދަ މުހިންމު ސްޓޭޓްތަކުން ބޮޑު ކާމިޔާބީއެއް ހޯއްދަވާފައެވެ.

ކުރީ ފަހަރާ ހިލާފަށް މިފަހަރު ޓްރަމްޕް ވެރިކަމަށް ވަޑައިގެންނެވީ ވަރަށްބޮޑު މަޤްބޫލުކަމެއް ރައްޔިތުންގެ ފަރާތުންވެސް ހޯއްދަވައިގެންނެވެ. މިގޮތުން ޓްރަމްްޕްކެ ކެމްޕެއިނުގައި މިފަހަރު ނުފޫޒުގަދަ އެތައް މަހުޖަނުންނެއް ވަނީ ބައިވެރިވެފައެވެ. މީގެ ތެރޭގައި ޓެސްލާ ކުންފުނީގެ ވެރިޔާ އީލޮން މާސްކް އާއި ފޭސްބުކްގެ ވެރިޔާ މާކް ޒަކަބާގް ފާހަގަކޮށްލެވެއެވެ. މީގެ އިތުރުން މިފަހަރުގެ ރިޔާސީ ރޭހުގައި ޓްރަމްޕް ވަނީ މުސްލިމުންގެ މަދަދުވެރިކަންވެސް ވަރަށްބޮޑަށް ހޯއްދަވާފައެވެ. އެގޮތުން އެމެރިކާގެ މުސްލިމް ކޮމިޔުނިޓީގެ އިސް ފަރާތްތައް ޓްރަމްޕްގެ ރެލީތަކުން ޓްރަމްޕާއެކު ފެނިގެންގޮސްފައިވާކަން ފާހަގަކޮށްލެވެއެވެ.

އައު ދައުރަކާ ހަވާލުވެ ވަޑައިގެންނެވުމަށްފަހު ޓްރަމްޕް ވިދާޅުވީ ކުރިއަށްއޮތީ އެމެރިކާއަށް އުފާފާގަތި ދުވަސްތަކެއްކަމަށާއި، އެމެރިކާއަކީ އެންމެ މުއްސަނދި އަދި އެންމެ ވަރުގަދަ އިޤްތިސާދު ކަމުގައި ހައްދަވާނޭކަމަށެވެ. ކުރިއަށްހުރި އިޤްތިސާދީ ރޭވުންތަކާ ބެހޭގޮތުން ޓްރަމްޕް ވިދާޅުވީ އޮޓޯމޯބައިލް ސިނާއަތަށް އިންގިލާބީ ބަދަލެއް ގެނެސް ރައްޔިތުން ސިއްސައިެގންދާފަދަ ހެޔޮ ބަދަލެއް ގެނެސްދެއްވާނެ ކަމަށެވެ. އެގޮތުން ކުރިއަށްއޮތް އަހަރުތަކުގައި އަނެއްކާވެސް އެމެރިކާ ފެނިގެންދާނީ އުފެއްދުންތެރި، އައު އީޖާދުތަކާގެން ކުރިއަށްދާ ޤައުމެއްގެ ގޮތުގައެވެ.

މީގެ އިތުރުން އެޤައުމުގައި ޤަވާއިދާހިލާފަށް އުޅެމުންދާ މީހުން، އެމީހުންގެ ވަޒަނަށް އަނބުރާ ފޮނުވާލައި، ބޯޑަރުހުރަސްކޮށް އެޤައުމަށް ވަންނަ ފަރާތްތައް ހުއްޓުވާނޭކަމަށްވެސް ޓްރަމްޕް ވަނީ ވިދާޅުވެފައެވެ.