ހުޅުމާލޭގައި ޤަވާއިދާ ހިލާފަށް ޕާކްކޮށްފައިހުރި އުޅަނދުތައް ނެގުމުގެ މަސައްކަތް ފުލުހުން މިއަދު ފަށައިފިއެވެ.

މިކަމާ ގުޅޭގޮތުން ފުލުހުން ބުނީ، ހުޅުމާލޭގެ އެކި ސަރަހައްދުތަކުގައި ޤަވާއިދާ ހިލާފަށް ޕާކްކޮށްފައިހުރި އުޅަނދުތައް ނެގުމުގެ މަސައްކަތް އެ މުއައްސަސާއިން ކުރަމުންގެންދާ ކަމަށެވެ. މިއީ އާންމު ރައްޔިތުންނަށް ފަސޭހަކަމާއެކު އެއްގަމު ދަތުރުފަތުރު ކުރެވޭނެ އެކަށީގެންވާ މާހައުލެއް ގާއިމުކުރުމަށާއި ޕާކް ކުރާނެ ޖާގަ ހެދުމަށް ކުރެވޭ މަސައްކަތެއްކަމަށްވެސް ފުލުހުން ބުނެއެވެ.

ހުޅުމާލޭގެ ފޭސް އެކެއް އަދި ފޭސް ދޭއްގައި އެއްވެސް ހަމައެއްނެތި އުޅަނދުތައް ޕާކްކުރުމުގެ މައްސަލަ ބޮޑުވެފައިވާއިރު، ފުލުހުން ވަނީ މީގެ ކުރިންވެސް ހުޅުމާލޭގެ އެކި ސަރަހައްދުތަކުގައި ނުނަގައި ގިނަދުވަސްވެފައި ހުރި އުޅަނދުތައް ނެގުމުގެ މަސައްކަތް ކުރިއަށްގެންގޮސްފައެވެ. ހުޅުމާލޭގައި ޕާކްކުރުމުގެ މައްސަލައަށް ހައްލު ހޯދުމަށް އެޗްޑީސީން ވަނީ ޕާކިންއަށް ހާއްސަކޮށް 15 އިމާރާތް އެޅުމަށް ބަޔަކާ އެމަސައްކަތް ހަވާލުކޮށްފައެވެ.