ހދ.ނޮޅިވަރަންފަރުގައި ފަތުރުވެރިއަކަށް ޖިންސީގޯނާ ކުރި ދިވެއްސެއްގެ މައްސަލަ ފުލުހުން ބަލަންފަށައިފިއެވެ.

ފުލުހުން މައުލޫމާތުދޭ ގޮތުގައި މި ހާދިސާ ހިނގާފައިވަނީ އިއްޔެގެ ވަގުތެއްގައެވެ. އެއީ ނޮޅިވަރަންފަރު ފަތުރުވެރިންނަށް ހާއްސަކޮށްފައިވާ ބީޗްގައި ފަތުރުވެރިޔާ އުޅެނިކޮށެވެ. ފުލުހުންނަށް އެ މައްސަލަ ރިޕޯޓްކޮށްފައިވަނީ، އިއްޔެގެ 14:45 ހާއިރުއެވެ. ފުލުހުން ބުނީ ފަތުރުވެރިޔާއަށް ޖިންސީ ގޯނާ ކުރިކަމުގެ ތުހުމަތުގައި 30 އަހަރުގެ ދިވެހި ފިރިހެނަކު ކޯޓް އަމުރެއްގެ ދަށުން ފުލުހުންގެ ބެލުމުގެ ދަށަށް ގެނެސްފައިވާކަމަށެވެ.

ފުލުހުން ބުނީ މި މައްސަލަ މިހާރު ތަހުގީގު ކުރަމުންދާކަމަށެވެ.

Advertisement

ރާއްޖޭގައި ލޯކަލް ޓޫރިޒަމް ތައާރަފް ވުމާއެކު މިހާރު ވަރަށް ގިނަ ފަތުރުވެރިން ރާއްޖޭގެ ރަށްތަކަށް ޗުއްޓީހޭދަކޮށްލުމަށް ގޮސް އުޅެއެވެ. މިގޮތުން ފަތުރުވެރިންނަށް ހިދުމަތް ދިނުމަށް ރަށްރަށުގައި ވަކި ސަރަހައްދު ތަކެއްގައި ފަތުރުވެރިންނަށް ހާއްސަކޮށް މޫދަށް އެރިލާނެ ސަރަހައްދުތައް ކަނޑައަޅާފައިވާކަން ފާހަގަކޮށްލެވެއެވެ.