މިއަހަރު ތެރޭގައި ތުއްތު ކުދިން ބޭނުންވާ ފަދައިން ރ.ކިނޮޅަހުގައި ޕާކެއް ހައްދަވައިދެއްވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ.މުޢިއްޒު މިފަދައިން ވިދާޅުވީ، އެމަނިކުފާނު މިހާރު ރ.އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅުގެ ކިނޮޅަހަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުންނެވެ.
ރައީސް ޑރ.މުޢިއްޒު ވިދާޅުވީ، އެރަށަށް ވަޑައިގެން ސަލާމް ކުރައްވަމުން ދިޔަ ވަގުތު، ކުޑަ ކުޑަ ކުދިން އެމަނިކުފާނަށް ކަރުދާސްކޮޅުތައް ދެމުންދިޔަ ކަމަށާއި، އޭގެ ތެރޭގައި ކުޅެލާނެ ޕާކެއް ނެތުމުން ދެރަވާކަމަށާއި، ޕާކެއް ހަދައިދިނުމަށް އެދޭ ވާހަކަތައް ހުރިކަމަށެވެ.
"ސަފުގައި، ސަލާމް ކުރަމުން ދިޔައިރުގައި، ކުޑަ ކުޑަ ކުދިން ކުޑަ ކުޑަ ކަރުދާސްކޮޅުތައް އަޅުގަނޑަށް ދެމުންދިޔަ. އޭގެ ތެރޭގައި އެބް އޮވޭ ކޮއްކޮ ކުޅެލާނެ ޕާކެއް ނެތީމައި ހާދަ ދެރަވެއޭ. ކޮއްކޮއަށް ޕާކެއް ހަދައިދޭށޭ. މިކަހަލަ ވާހަކަތައް،"
ރައީސް ޑރ.މުޢިއްޒު ވިދާޅުވިއެވެ.
އެއްވެސް ތަފާތެއް ނެތި ކުދި އާބާދީތަކުގައި އާއި ބޮޑެތި އާބާދީތަކުގައި ވެސް ކޫޑަކުދިންނަށް ކުޅެވޭނެ ގޮތަށް ޕާކުތައް ހެދުމަކީ ތަރައްގީ ގެނެސްދިނުމުގައި ވަރަށް މުހިންމުކަމެއްކަން ފާހަގަކުރައްވާ ރައީސް ޑރ.މުޢިއްޒު ވިދާޅުވީ، ރަށުގައި ހުންނަ ބޮޑެތި އިމާރާތްތަކާއި މަގުތަކާއި ބޮޑެތި ކަންކަމާއި އެކުގައި ތުއްތު ކުދިންނާއި އާއިލާތަކަށް ހިތަށް ހިތްހަމަޖެހުން ލިބޭނެކަހަލަ ވަސީލަތްތައް ވެސް ހުންނަންޖެހޭނެކަމަށާއި، އެއީ ވަށާޖެހޭ ތަރައްގީއެއް ސަރުކާރަކުން ގެނެސްދޭކަމަށްވާނަމަ ހިމެނެން ޖެހޭނެކަންކަން ކަމަށެވެ.
މިގޮތުން މީގެ ކުރިން މާލޭގައި އެކި މަސައްކަތްތައް ކުރަން ފުރުސަތު ލިބުނުއިރު ވެސް ވަރަށް ތޮއްޖެހިފައި އޮތްނަމަވެސް އެކި ގޮތްގޮތުން ޖާގަ އުފައްދައިގެން ވަރަށް ގިނަ ޕާކުތައް ހެދިކަމަށާއި، އެފަދަ ޖާގަތައް އުފެއްދުމުން އާއިލާތަކަށާއި ކުޑަކުދިންނަށް ހިތްހަމަޖެހުން ލިބޭނެކަމަށެވެ.
ރައީސް ޑރ.މުޢިއްޒު ވިދާޅުވީ، ކޮންމެ ރަށެއްގައި ވެސް ޕާކެއް ހެދުމަކީ މި ސަރުކާރުގެ ސިޔާސަތެއް ކަމަށާއި، މިއަހަރު ބަޖެޓުގައި އިޖްތިމާއީ ދާއިރާއިން ކުރަން ހުރި ކަންކަމަށް އިސްކަންދޭނެ ކަމަށެވެ.
"މިހާރު އަޅުގަނޑުމެން ފާސްކޮށްގެން ތަންފީޒު ކުރާ ބަޖެޓުގައި ވަރަށް ބޮޑުއިސްކަމެއްދެން އިޖުތިމާއީ ދާއިރާގައި ކުރަން ހުރި ކަންކަމުގައި އެކަހަލަ ޕާކުތައް ހަދައިދީ، ކުޅިވަރު ކުޅޭ ވަސީލަތްތަކާއި މިހެން ހުރި ދުޅަހެޔޮކަމާއި ސިކުނޑީގެ ތަރައްގީއަށް، ހިތްހަމަޖެހުމަށް ބޭނުންވާ ކަންކަން ކުރަން،"
ރައީސް ޑރ.މުޢިއްޒު ވިދާޅުވިއެވެ.
އެހެންކަމުން، ރައީސް ޑރ.މުޢިއްޒު ވަނީ މިއަހަރުގެ ތެރޭގައި ކިނޮޅަހުގެ ތުއްތު ކުދިން ބޭނުންވާހެން ޕާކެއް ހައްދަވައިދެއްވާނެކަމުގެ ޔަގީންކަން ދެއްވާފައެވެ.
Advertisement
This content is created and paid for by advertisers and does not involve Voice Journalists
