އެމެރިކާގެ ރައީސްކަމުގެ މަގާމަށް ދެވަނަ ދައުރަކަށް ޑޮނަލްޑް ޓްރަމްޕް ހުވާކުރެއްވުމާއެކު، އެމެރިކާގެ ޚާރިޖީ ވަޒީރު މާކޯ ރޫބިއޯ ފުރަތަމަ ދުވަހު ބޭއްވެވި ބައްދަލުކުރެއްވުންތަކުން، ޗައިނާއަކީ އެމެރިކާގެ ފޯކަސް އޮންނާނެ ގައުމެއްކަން އަނެއްކާވެސް އިތުރަށް ކަށަވަރުވެއްޖެއެވެ.

ޗައިނާއިން އިސްތިރާޖީ އަދި އަސްކަރީ ގޮތުން ހޯދާ ކުރިއެރުންތަކަށް ފާރަވެރިވެ، އެކުގައި މަސައްކަތްކުރުމަށް އެމެރިކާ، އިންޑިއާ، ޖަޕާން އަދި އޮސްޓްރޭލިއާ ގުޅިގެން އުފައްދާފައިވާ ކުއަޑްގެ ބައްދަލުވުމެއް، އިއްޔެ ވޮޝިންޓަނުގައި އޮތެވެ. މާކޯ ރޫބިއޯގެ ޚާރިޖީ ވަޒީރުކަމުގެ ފުރަތަމަ ދުވަހު ބޭއްވި މި ބައްދަލުވުމުގައި ހަތަރު ގައުމު ޚާރިޖީ ވަޒީރުން ބައިވެރިވެވަޑައިގަތެވެ. މި ބައްދަލުވުމަށްފަހު ނެރުނު ގުޅިފައިވާ ބަޔާނުގައި ބުނީ ކުއަޑްގެ ގައުމުތަކުން ގަވައިދުން ބައްދަލުކުރަމުންދާނެކަމަށާއި، މިއަހަރު ދިއްލީގައި ބާއްވާނެކަމަށް ބެލެވޭ ކުއަޑްގެ ގައުމުތަކުގެ ލީޑަރުންގެ ސަމިޓަށް ތައްޔާރުވާނެކަމަށެވެ. އަދި، ގާނޫގެ ވެރިކަން ހިނގާ، ގައުމުތަކުގެ އިސްތިޤްލާލަށް އިހްތިރާމްކުރާ ހުޅުވާލެވިފައިވާ އިންޑޯ ޕެސިފިކްއެއް އޮތުމަށް ހަތަރު ގައުމުންވެސް ގުޅިގެން މަސައްކަތްކުރާނެކަން ބަޔާންކޮށް، ގަދަބާރުން ޗައިނާއިން ޓައިވާނަށް ނާރާން ނުސީދާކޮށް އިންޒާރުވެސް ދީފައިވެއެވެ.

ކުއަޑްގެ ބައްދަލުވުމުގައި ބައިވެރިވެވަޑައިގަތީ ރޫބިއޯގެ އިތުރުން އިންޑިއާގެ އެކްސްޓަރނަލް އެފެއަރޒް މިނިސްޓަރ ޑރ. ސުބްރަމާނިއަމް ޖައިޝަންކަރު، އޮސްޓްރޭލިއާގެ ފޮރިން މިނިސްޓަރ ޕެނީ ވޮންގް އަދި ޖަޕާނުގެ ފޮރިން މިނިސްޓަރ ޓަކެޝީ އިވަޔާ އެވެ.

ޓްރަމްޕް ހުވާކުރެއްވުމަށްފަހު ގިނަ ވަގުތުތަކެއް ނުވެ ކުއަޑްގެ ބައްދަލުވުމެއް ބޭއްވުނުކަމީ ފާހަގަކޮށްލެވޭ ކަމެއްކަމަށް ޑރ ޖައިޝަންކަރު ވިދާޅުވިއެވެ.