އާއްމު ސަރަހައްދުތައް ސިލްސިލާކޮށް މޮނިޓަރ ކުރުމަށް މޯލްޑިވްސް އިމިގްރޭޝަނުން ނިންމައިފިއެވެ.

އިމިގްރޭޝަނުން އެކްސްގައި ކުރި ޕޯސްޓެއްގައި ބުނީ، އާންމު ސަރަހައްދުތަކަށް އެއްވެ އުޅޭ ބިދޭސީންގެ މެދުގައި ފަހަކަށް އައިސް އާއްމު މަސްލަހަތު ގެއްލޭފަދަ ކަންކަން ހިންގަމުންދާކަން ފާހަގަ ކުރެވޭތީ، މިއަދު އިމިގްރޭޝަންގެ އެންފޯސްމަންޓް އެންޑް ކޮމްޕްލަޔަންސް ޑިވިޝަންގެ އޮފިސަރުން  ސަރަހައްދުތައް މޮނިޓަރކުރަން ފަށާފައިވާކަމަށެވެ.

އާއްމު މަސްލަހަތައް ނުރައްކާވާފަދަ މިފަދަ އަމަލުތައް ތަކުރާރުވިއަ ނުދިނުމަށްޓަކައި މި ހަރަކާތް ސިލްސިލާކޮށް ކުރިއަށް ގެންދިއުމަށް ނިންމާފައިވާކަމަށް އިމިގްރޭޝަނުން ބުނެއެވެ.

މިއާއިއެކު އިމިގްރޭޝަނުން ބުނީ، މި ހަރަކާތްތައް ކުރިއަށްދާއިރު ގަވާއިދާ ހިލާފަށް އުޅޭ ބިދޭސީންގެ މައްަސަލައެއް ފާހަގަވެއްޖެނަމަ ޓާސްކުފޯހުން އެފަދަ ބިދޭސީންނާ މެދު ފިޔަވަޅު އަޅާނެކަމަށެވެ.

އިމިގްރޭޝަނުން މިފަދައިން ބުނެފައިވާއިރު، އާޓިފިޝަލް ބީޗު ސަރަހައްދުގައި މިމަހުގެ ތެރޭގައި ބިދޭސީންގެ މެދުގައި  ހިންގި ހަމަނުޖެހުންތަކުގައި ފުލުހުންގެ ބެލުމުގެ ދަށަށް ގެންދިޔަ ބިދޭސީންތައް ޑީޕޯޓްކުރުމުގެ މަސައްކަތް އިމިގްރޭޝަނުން ފަށާފައިވާކަން ފާހަގަކޮށްލަން ޖެހެއެވެ.

ބިދޭސީން މީގެ ކުރިންވެސް ބަންދުދުވަސްދުވަހު އިރުއޮއްސޭގަޑީގައި އެ ސަރަހައްދަށް ޖަމާވެ މާރާމާރީ ހިންގަމުންގެންގޮސްފައިވާކަން ފާހަގަކޮށްލެވެއެވެ. މިގޮތުން މިދިޔަ ޑިސެމްބަރުމަހުގެ 6 ވަނަ ދުވަހު އާޓިފިޝަލް ބީޗްގައި މާރާމާރީގައި އިސްކޮށްހުރި އަމްރިތް ސިންގު ނަމަކަށް ކިޔާ މީހަކު ވަނީ އިމިގްރޭޝަނުން ޑީޕޯޓްކޮށްފައެވެ. އެދުވަހު ހިންގި މާރާމާރީގައި ކުޑަކުއްޖަކަށްވެސް ވަނީ އަނިޔާވެފައެވެ.