މިދިޔަ ހަފްތާގެ ބުރާސްފަތި ދުވަހު، މަޖީދީ މަގުގައި ހުންނަ ފުރުޓް ޓްރީ އެޕަލް ފިހާރައިގެ ގުދަނުގައި އަލިފާނުގެ ހާދިސާ ހިނގިތަން ސާފުކޮށް މަގު ހުޅުވާލައިފިއެވެ.

މިކަން ހާމަކުރައްވާ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު އެކްސްގައި ކުރެއްވި ޕޯސްޓެއްގައި ވިދާޅުވީ، އަލިފާނުގެ ހާދިސާ ހިނގި ކެލާގޭގެ ތަޅާލަންޖެހޭ ބައިތަށް ތަޅާލުމަށްފަހު، ކުނިތައް ނަގައި، އެ އިމާރާތް ސާފުކުރުމުގެ މަސައްކަތް ނިންމައިފައިވާކަމަށާއި، އެ މަސައްކަތް ކުރުމަށްޓަކައި މަޖީދީމަގުން ބަންދުކޮށްފައިވާ ސަރަހައްދު މިހާރު ހުޅުވައިލައިފައިވާކަމަށެވެ.

މިއާއިއެކު ވަޒީރު އާދަމް ޝަރީފް ވަނީ މިކަމުގައި އެ ވުޒާރާގެ ޕަބްލިކް ވާރކްސްގެ މުވައްޒަފުން ކުރެއްވި މަސައްކަތްތައް ފާހަގަކުރައްވާފައެވެ.

Advertisement

ފުރުޓް ޓްރީ ފިހާރައިގެ ގުދަނުގައި ރޯވި ކަމުގެ މައުލޫމާތު އެމްޑީއެފަށް ލިބުނީ އެދުވަހުގެ 04:20 ހާއިރު ކަމަށާއި އަލިފާންގަނޑު އެއްކޮށް ނިއްވާލާފައިވަނީ 06:00 ހާއިރު ކަމަށް އެމްއެންޑީއެފުން ވަނީ ބުނެފައެވެ.

މި ހާދިސާއާއި ގުޅިގެން އެންޑީއެމްއޭއިން ވަނީ  14 ދިވެހީންނާއި 19 ބިދޭސީންނަށް ވަގުތީ ބޯހިޔާވަހިކަން ފޯރުކޮށްދީފައެވެ.