އެންޓި-ކޮރަޕްޝަން ކޮމިޝަނުން (އޭސީސީ) ތަޙުޤީޤުކުރަމުންދާ ހިޔާނާތުގެ ބޮޑެތި މައްސަލަތަކުގެ ތަޙުޤީޤު އަވަސްކުރުމަށް ޕްރޮސިކިއުޓަރ ޖެނެރަލް އަމުރު ކުރައްވައިފިއެވެ.
ޕީޖީ އޮފީހުން މިފަދައިން އަމުރު ކޮށްފައިވަނީ، އޭސީސީން ހިންގާ ޖިނާއީ ތަޙުޤީޤުތައް އެކަށީގެންވާ އަވަސްމިނެއްގައި ހިނގަމުން ނުދާކަމުގެ ޝަކުވާ ޕްރޮސިކިއުޓަރ ޖެނެރަލްގެ ސަމާލުކަމަށް އައުމާ ގުޅިގެން ކަމަށް އެ އޮފީހުން ބުންޏެވެ.
އެގޮތުން ޕްރޮސިކިއުޓަރ ޖެނެރަލް ވަނީ، ދައުލަތާއި ޢާންމު ރައްޔިތުންގެ މަޞްލަޙަތު މަތީ މިންވަރަކަށް ހިމެނޭ މައްސަލަތަކުގެ ތަޙުޤީޤު ލަސްވުމުގެ ސަބަބުން، ދައުލަތަށް ގެއްލޭ ފައިސާ އަނބުރާ ހޯދުމަށާއި ޢާންމު މަޞްލަޙަތަށް އުނިކަން އަންނަމުންދާކަން ފާހަގަކުރައްވާފައެވެ.
މި ކަންބޮޑުވުންތަކާ ގުޅިގެން، ޤާނޫނުއަސާސީގެ 223 ވަނަ މާއްދާގެ (ޅ) އާއި (ފ) ގެ ދަށުން ލިބިދޭ ބާރުގެ ދަށުން، އޭސީސީން ތަޙުޤީޤުކުރަމުންދާ މައްސަލަތައް ޕްރޮސިކިއުޓަރ ޖެނެރަލްގެ އޮފީހަށް ހުށަހެޅުމުގައި ޢަމަލުކުރާނެ ގޮތުގެ އިރުޝާދެއް އެކުލަވާލައި، މިއަދުން ފެށިގެން އެ އިރުޝާދަށް ޢަމަލުކުރުމަށް އޭސީސީއަށް އަމުރުކޮށްފައިވެއެވެ.
ޕްރޮސިކިއުޓަރ ޖެނެރަލްގެ އަމުރުގައި، އެމް.އެމް.ޕީ.އާރު.ސީ މައްސަލަ، ކޮވިޑް-19 އާ ގުޅިގެން ދައުލަތުގެ މުދަލާއި ފައިސާ ނަހަމަގޮތުގައި ބޭނުންކުރުމުގެ މައްސަލަ، އަދި ސަރުކާރު ޙިއްޞާވާ ކުންފުނިތަކާއި ބިންވެރިޔާ އަދި ގެދޮރުވެރިޔާ ސްކީމްއާ ގުޅުންހުރި މައްސަލަތައް ފަދަ ޚާއްޞަ މައްސަލަތަކުގެ ތަޙުޤީޤު އަވަސްކުރުމަށް އަންގާފައިވެއެވެ.
މި އިރުޝާދުގެ މައިގަނޑު މަޤްޞަދަކީ އޭސީސީން ތަޙުޤީޤުކުރާ މައްސަލަތަކުގެ ތަޙުޤީޤު އަވަސްކުރުމާއި، ތަޙުޤީޤުތަކުގެ މަރުޙަލާތައް ކުރިއަށްގެންދާނެ ސިސްޓަމިކް ގޮތްތަކެއް ކަނޑައެޅުމާއި، ޖިނާއީ މައްސަލަތައް ބަލާ އެކިއެކި އިދާރާތަކުން ހިންގާ ތަހުޤީޤުތަކުގެ ޔުނީފޯމިޓީ ކަށަވަރުކުރުމެވެ. އަދި ތަޙުޤީޤުގެ ކުރީ މަރުޙަލާއިން ފެށިގެން ޕްރޮސިކިއުޓަރ ޖެނެރަލްގެ އޮފީހުގެ ލަފާ ހޯދުމަށް އިތުރަށް ފަސޭހަކޮށްދިނުމެވެ.
Advertisement
This content is created and paid for by advertisers and does not involve Voice Journalists
