ނޫސްވެރިކަމާ އިންޓަރނެޓް ރެގިއުލޭޓް ކުރާ ބިލެއް ތަޢާރަފްކުރަން ސަރުކާރުން މަސައްކަތްކުރަމުންދާކަމަށް ދެކެވޭ ވާހަކަތައް ރައީސުލްޖުމްހޫރިއްޔާ އޮފީހުގެ ތަރުޖަމާން ހީނާ ވަލީދު ދޮގުކުރައްވައިފިއެވެ.

ރައްޔިތުންގެ މަޖިލީހުގެ ނައިބު ރައީސް އަދި ޕީއެންސީގެ މެންބަރު އަހުމަދު ނާޒިމް ވަނީ ސަން މީޑިއާގައި ވާހަކަދައްކަވަމުން ނޫސްވެރިކަމާއި އިންޓަރނެޓްގެ ވަސީލަތްތައް ރެގިއުލޭޓް ނުކުރެވޭކަމަށް ވިދާޅުވެ، އެކަން ކުރުމަށްޓަކައި ބިލެއް އެކުލަވާލުމުގެ މަސައްކަތް ކުރަމުން އަންނަކަމަށް ވިދާޅުވެފައެވެ. 

މިކަމާ ގުޅޭގޮތުން ރައީސުލްޖުމްހޫރިއްޔާ އޮފީހުގެ ތަރުޖަމާން އެކްސްގައި ކުރެއްވި ޕޯސްޓެއްގައި ވިދާޅުވީ، ނޫސްވެރިކަމާ އިންޓަރނެޓް ރެގިއުލޭޓް ކުރާ ބިލެއް ތަޢާރަފް ކުރުމަށް ސަރުކާރުން އެެއްވެސް މަސައްކަތެއް ނުކުރައްވާކަމަށެވެ. ހިނާ ވިދާޅުވީ، ސަރުކާރުގެ ލެޖިސްލޭޓިވް އެޖެންޑާގައިވެސް އެފަދަ ބިލެއް ހިމެނިފައި ނުވާނޭ ކަމަށާއި. ކުރިއަށްއޮތް ތަނުގައިވެސް ސަރުކާރުން އެފަދަ ބިލެއް ތަޢާރަފް ކުރުމުގެ ވިސްނުމެއްނެތްކަމަށެވެ.

ހީނާ ވިދާޅުވީ ކުރިންވެސް ހާމަކުރައްވާފައިވާ ގޮތަށް މީޑިއާތައް ޑީ ރެގިއުލޭޓް ކުރުމާއެކު ސެލްފް ރެގިއުލޭޓަރީ ނިޒާމަކަށް ފުރުސަތު ދިނުން އެއީ ސަރުކާރުގެ ސިޔާސަތުކަމަށާއި، ސަރުކާރުގެ އެންމެ ފުރަތަމަ ދުވަހުން ފެށިގެންވެސް އެންމެ އިސްކަންދޭ ސިޔާސަތަކީ މީޑިއާގެ މިނިވަންކަން އެންމެ ފުޅާ ދާއިރާއެއްގައި ޤާއިމްކޮށް ދެމެހެއްޓުމަށްކަމަށް ހީނާ ވިދާޅުވިއެވެ.

ނޫސްވެރިކަމާއި އިންޓަރނެޓްގެ އެކިއެކި ވަސީލަތްތައް ރެގިއުލޭޓް ކުރުމާ ގުޅޭގޮތުން ސަންގައި ވާހަކަދައްކަވަމުން މެމްބަރު ނާޒިމް ވިދާޅުވީ މެލޭޝިއާގައި އޮންނަގޮތަށް މަލްޓި މީޑިއާ ކައުންސިލެއް ވުޖޫދަށް ގެނައުމަކީ ރާއްޖެއަށް ރަނގަޅު ގޮތެއްކަމަށެވެ. އެއީ މިހާރަށްވުރެ ބޮޑަށް ނޫސްވެރިކަމާއި އިންޓަރނެޓްގެ އެކި އެކި ވަސީލަތްތައް ރެގިއުލޭޓްކުރެވެން ޖެހޭކަމަށް ނާޒިމް ވަނީ ވިދާޅުވެފައެވެ.

ނާޒިމް ވިދާޅުވީ މި ދައުރުގެ ތެރޭގައި ބިލް ހުށަހެޅުމުގެ މަސައްކަތްކުރަމުންގެންދާ ކަމަށެވެ. އިންޓަރނެޓާއި މީޑިއާ ރެގިއުލޭޓް ކުރަން ބިލެއް ހުށަހެޅުމަށް ތައްޔާރުވަމުންދާކަމަށް ސަރުކާރަށް ނިސްބަތްވެ ވަޑައިގަންނަވާ މެމްބަރު ނާޒިމް ވިދާޅުވިއިރު، ތުޅާދޫ ދާއިރާގެ މެމްބަރު އަބްދުﷲ ހަންނާން އަބޫބަކުރު ވަނީ، މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނުގެ ނަމުގައި މަޖިލީހަށް ބިލެއް ހުށަހަޅުއްވާފައްެވެ.، ނަމަވެސް މީޑިއާތަކުގެ ކަންބޮޑުވުމާއެކު އެބިލް ވަނީ އަނބުރާ ގެންގޮސްފައެވެ.