ޑިމޮކްރެޓްސް މެމްބަރުން އޮޅުވާލައިގެން ސަރުކާރު ހިންގާ ޕީއެންސީއަށް ވެއްދި މައްސަލަ ފުލުހަށް ހުށަހަޅައިފިއެވެ.
މިކަމާގުޅިގެން ޑިމޮކްރެޓްސްއިން އެކްސްގައި ކުރި ޕޯސްޓެއްގައި ބުނެފައިވަނީ، ވަގު ފޯމުތަކެއް ފުރައިގެން އެ ޕާޓީގެ އެތަކެއް މެމްބަރަކު ޕީއެންސީ އަށް ވައްދާފައިވާކަމަށެވެ. ޑިމޮކްރެޓްސް އިން ބުނީ އެ މައްސަލައާއި ގުޅިގެން ދިވެހިރާއްޖޭގެ ގާނުނުލްއުގޫބާތުގެ 310 ވަނަ މާއްދާގައި ބަޔާންކުރާ ހަމަތަކުގެ މަތިން އެ މައްސަލަ ތަހުގީގުކޮށް، އެ އަމަލު ހިންގި މީހުންގެ މައްޗަށް ޖިނާއީ ދައުވާ އުފުލައިދިނުމަށް ފުލުހުންގެ މުއައްސަސާއަށް މިއަދު ހުށަހަޅާފައިވާކަމަށެވެ.
މީގެ އިތުރުން ސިޔާސީ ޕާޓީތަކުގެ ގާނޫނުގެ 49 ވަނަ މާއްދާގައި ބަޔާންކުރާ ހަމަތަކުގެ ދަށުން އެ ފަރާތްތައް ޖޫރިމަނާކޮށް، މި ޕާޓީގެ ދަފްތަރުން އުނިކޮށްފައިވާ މެމްބަރުންގެ މެމްބަޝިޕް އަލުން އިއާދަކޮށްދިނުމަށް އިލެކްޝަން ކޮމިޝަނަށް ހުށަހަޅާފައިވާނޭކަމަށްވެސް ޑިމޮކްރެޓްސް އިން ބުނެއެވެ.
ޕީއެންސީން ވަގަށް ފޯމްތަކެއް ފުރި މައްސަލައިގަ އިދިކޮޅު މައި ޕާޓީ، އެމްޑީޕީންވެސް ވަނީ ކަންބޮޑުވުން ފާޅުކޮށްފައެވެ. އެމްޑީޕީން އެ މައްސަލަ ވަރަށް ސީރިއަސްކޮށް ނަގާފައިވައިރު، އެޕާޓީން ވަނީ މި މައްސަލަ ބަލައިދިނުމަށްއެދި ކަމާބެހޭ އިދާރާތަކަށް ހުށަހަޅާފައެވެ. މީގެ އިތުރުން މި މައްސަލާގައި ދާހިލީ ވަޒީރު އަލީ އިހްސާނުގެ ބައިވެރިވުން އޮތްކަމަށް ބެލެވޭތީ، އެމްޑީޕީގެ މެމްބަރުން ވަނީ މިނިސްޓަރު އިހްސާން ވަކިކުރުމަށް މަޖިލީހަށްވެސް ހުށަހަޅާފައެވެ.
އޮޅުވާލައިގެން ޕީއެންސީއަށް މީހުން ވެއްދުމުގެ މައްސަލަތަކެއް ފެންމަތިވެފައިވާއިރު، ވެއްދި މީހުންގެ ތެރޭގައި އެމްޑީޕީއަށް ނިސްބަތްވެ ވަޑައިގަންނަވާ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) ހިމެނެއެވެ.
Advertisement
This content is created and paid for by advertisers and does not involve Voice Journalists
