ދ އަތޮޅު ކައުންސިލާއި، ރ.އިނގުރައިދޫ އަދި ލ. މާވަށު ކައުންސިލަށް ފަޅުރަށްތައް ރަސްމީކޮށް ހަވާލުކޮށްފިއެވެ. އެގޮތުން، މާލީ ގޮތުން ކައުންސިލްތައް ބާރުވެރިކުރުމަށްޓަކައި، ފަޅުރަށްތައް ކައުންސިލްތަކާ ހަވާލުކުރެއްވުމުގެ އުސޫލުގެދަށުން 4 ފަޅުރަށެއްވަނީ ހަވާލުކުރައްވާފައެވެ.

މިކަމަށް ޚާއްސަކޮށް މިއަދު މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާގައި ބޭއްވުނު ރަސްމިއްޔާތުގައި، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއާއި، މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާ ގުޅިގެން އެކަމުގެ އެއްބަސްވުމުގައި ކައުންސިލްތަކާއެކުވަނީ ސޮއިކުރައްވާފައެވެ.

* ދ.އަތޮޅު ކައުންސިލަށް ހަވާލުކޮށްފައިވަނީ ދ. މިނިމަސްގަލި އާއި ދ. ފެންފުށި

* ރ.އިނގުރައިދޫ ކައުންސިލަށް ހަވާލުކޮށްފައިވަނީ ރ.ނެޔޮ 

* ލ.މާވަށު ކައުންސިލާ ހަވާލުކޮށްފައިވަނީ ލ.ބޮޑުމާބުޅަލި

ކައުންސިލް ތަކަށް ފަޅުރަށްތައް ހަވާލުކުރުމަށް މިއަދު ބޭއްވި ރަސްމިއްޔާތުގެ ތެރެއިން: ފޮޓޯ/ ވޮއިސް

މި އެއްބަސްވުންތަކުގައި ދ. އަތޮޅު ކައުންސިލްގެ ފަރާތުން ސޮއިކުރެއްވީ އަތޮޅު ކައުންސިލްގެ ރައީސް އަޙްމަދު ޝާފިޢުއެވެ. އެއްބަސްވުމުގައި ރ. އިނގުރައިދޫ ކައުންސިލްގެ ފަރާތުން ސޮއިކުރެއްވީ އިނގުރައިދޫ ކައުންސިލްގެ ރައީސް މުޙައްމަދު ޖަލީލްއެވެ. އަދި ލ. މާވަށު ކައުންސިލްގެ ފަރާތުން ސޮއިކުރެއްވީ މާވަށު ކައުންސިލްގެ ރައީސް އަޙްމަދު މޫސާއެވެ.

މި އެއްބަސްވުންތަކުގައި މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ އަޙްމަދު މާޒިންއެވެ.

ކައުންސިލް ތަކަށް ފަޅުރަށްތައް ހަވާލުކުރުމަށް މިއަދު ބޭއްވި ރަސްމިއްޔާތުގެ ތެރެއިން: ފޮޓޯ/ ވޮއިސް

މިއީ، ކައުންސިލްގެ އިޚްތިޞާޞުން ބޭރުން، ފަޅުރަށްރަށް ކައުންސިލްތަކަށް ދޫކުރެވޭ އެންމެ ފުރަތަމަ ފަހަރެވެ.

ރައީސް ޑރ މުޙައްމަދު މުޢިއްޒުގެ 100 ދުވަހުގެ ވަޢުދުތަކުގެ ތެރޭގައި ހިމެނިގެން، ގަވާއިދަށް އިޞްލާޙު ގެނެވި، ފުރުސަތު ހުޅުވާލެވި، ކައުންސިލްތައް ބާރުވެރިކުރުވުމަށް މަސައްކަތްކުރެވި، ފުރުސަތު ފަހިކޮށްދެވިގެން، މިއަދު 3 ކައުންސިލަކަށް ރަށްތައް ދޫކުރެވިފައިވާއިރު، ރަށަށާއި އަތޮޅަށް ފައިދާވާގޮތަށް އެތަންތަނުގެ ބޭނުން ހިފުމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު ޢާދަމް ޝަރީފް ޢުމަރު ވަނީ އެދިވަޑައިގެންފައެވެ.