ގދ. ތިނަދޫ ސިޓީ ކައުންސިލުގެ އިދާރާގެ ތަކެތި އެންޓި ކޮރަޕްޝަން ކޮމިޝަން (އޭސީސީ) އިން ވަގަށް ގެންދިޔަ ކަމަށް ކުރި ތުހުމަތު އޭސީސީން ދޮގު ކޮށްފިއެވެ.

މިއަދު ތިނަދޫ ސިޓީ ކައުންސިލުން ފޭސްބުކްގައި ކުރި ޕޯސްޓެއްގައި ބުނީ، އޭސީސީގެ ނަމުގައި އައި ބަޔަކު ތިނަދޫ ސިޓީ ކައުންސިލްގެ ގިނަ އަދަދެއްގެ ތަކެތި ވަގަށް ނަގާފައިވާކަމަށާއި، މި މައްސަލަ ފުލުހަށް ހުށަހެޅި ބަލަމުންދާތީ ކައުންސިލްގެ ބައެއް ޚިދުމަތްތައް މެދު ކެނޑިފައިވާކަމަށެވެ.

މިއާއިއެކު އޭސީސީން ނެރުނު ބަޔާނެއްގައި ބުނީ، ތިނަދޫ ސިޓީ ކައުންސިލާއި ގުޅޭ ގޮތުން ތަހުގީގު ކުރަމުންދާ މައްސަލައަކާއި ގުޅިގެން މިމަހުގެ 26 ވަނަ ދުވަހު އެ ކޮމިޝަނުގެ ޓީމެއް އެ ކައުންސިލްގެ އިދާރާގައި ހަރަކާތްތެރިވެފައިވާކަމަށެވެ.

Advertisement

އެގޮތުން ތަހުގީގަށް ބޭނުންވާ ލިޔެކިޔުންތައް ހޯދުމުގެ މަސައްކަތް ކުރި ކަމަށާއި، މިކަމުގައި ކައުންސިލްގެ އެއްބާރުލުން ލިބިފައިނުވާކަމަށް އޭސީސީން ވަނީ ބުނެފައެވެ.

އެހެންނަމަވެސް ކޮމިޝަނުގެ ގާނޫނީ އިމުގެ ތެރެއިން އެންމެހާ އިޖުރާއަތްތައް ފުރިހަމަ ކުރުމަށްފަހު ތަހުގީގަށް ބޭނުންވާ ލިޔެކިޔުން ހޯދާފައިވާ ކަމަށާއި، މިކަމާއި ގުޅޭ ގޮތުން ކައުންސިލުން ހާމަކޮށްފައިވަނީ ދޮގު މައުލޫމާތު ތަކެއް ކަމަށް އޭސީސީގެ ބަޔާނުގައި ވެއެވެ.

މިކަމާއި ގުޅިގެން އޭސީސީން ވަނީ އެ ކޮމިޝަނާއި ގުޅޭގޮތުން ފަތުރަމުންދާ ހަގީގަތާއި ހިލާފު މައުލޫމާތު ބަލައިނުގަނެވޭކަމަށާއި، އެކަމާއި މެދު ކަންބޮޑުވާކަމަށް ބުނެފައެވެ.