ޖާހް ކޮންސްޓްރަކްޝަނުގެ ފަރާތުން ހުޅުމާލޭ ފޭސް އެކެއްގައި ތަރައްޤީކުރަމުން އަންނަ "ދަ ގާޑަންސް" ޓަވަރު ނިންމުމަށް އެކުންފުންޏަށް އެންމެ ފަހު ފުރުސަތު އެޗްޑީސީން ދީފިއެވެ.
ބޯހިޔާވަހިކަމަށް ތަރައްޤީކުރުމަށް ނިންމައި ޖާހް ކޮންސްޓްރަކްޝަނަށް "ދަ ގާޑަންސް" ތަރައްޤީކުރުމަށް ހަވާލުކޮށްފައިވަނީ މީގެ 7 އަހަރުކުރިން 2017 ވަނަ އަހަރެވެ. "ދަ ގާޑަންސް" ޓަވަރު ނުނިމި ދިގުލައިގެންދާ މައްސަލާގައި މިއަދު އެޗްޑީސީން ނެރުނު ބަޔާނުގައި ބުނެފައިވަނީ، "ދަ ގާޑަންސް" ޕްރޮޖެކްޓް ނިންމުމަށްޓަކައި އެކި ފަހަރު މަތިން ޖާހު އިންވެސްޓްމަންޓް ޕްރައިވެޓް ލިމިޓެޑަށް މުއްދަތު އިތުރުކޮށް ދީފައިވާކަމަށާއި، އެއްބަސްވުން ބާޠިލުކުރުމުގެ އެންމެ ފަހު މަރުހަލާގެ ދަށުން ދެވޭ ޤާނޫނީ ނޯޓިސް މިއަދު އެކުންފުންޏަށް ފޮނުވާފައިވާކަމަށެވެ.
އެޗްޑީސީން ބުނީ، ނޯޓިސް ދީފައިވަނީ 45 ދުވަހުގެ ތެރޭގައި ޖާހު އިންވެސްޓްމަންޓް ޕްރައިވެޓް ލިމިޓެޑުގެ ފަރާތުން މި ޕްރޮޖެކްޓްގެ ނުނިމި ހުރި މަސައްކަތްތައް ނުނިންމާ ހާލަތުގައި، މި އެއްބަސްވުން ބާޠިލުކޮށް އެ ޕްރޮޖެކްޓް އެކުންފުނީގެ އަތުން ނަގާގޮތަށް ކަމަށެވެ. އެޗްޑީސީން ބުނީ މި އެޅި ފިޔަވަޅު އަޅާފައިވަނީ ޖާހު އިންވެސްޓްމަންޓް ޕްރައިވެޓް ލިމިޓެޑަށް އެޕާޓްމަންޓް ގަތުމަށް ފައިސާ ދައްކާފައިވާ ފަރާތްތަކަށް، ވީ އެންމެ އަވަސް މުއްދަތެއްގައި، އެޕާޓްމަންޓްތައް ޙަވާލުކުރެވޭނެ މަގު ފަހި ކުރުމުގެ ބޭނުމުގައިކަމަށެވެ.
ޖާހް އިންވެސްޓްމަންޓުން ތަރައްޤީކުރަމުން އަންނަ ޓަވަރުގެ ކުރެހުމެއް
"ދަ ގާޑަންސް" ޓަވަރުގެ ފްލެޓްތައް ނުނިމި ދިގުލަމުންދާ މައްސަލާގައި އެތަނަށް ފައިސާ ދެއްކި ގިނަ އަދަދެއްގެ ފަރާތްތަކުން ވަނީ ބަދަލުހޯދުމަށް އެދި ރައީސް އޮފީހަށް ސިޓީވެސް ލާފައެވެ.
"ދަ ގާޑަންސް" ޓަވަރު ނުނިމި ދިގުލަމުންދިޔަ މައްސަލާގައި އެންމެފަހުން ޖާހް ކުންފުނިން ނޫސްވެރިންނާ ބައްދަލުކޮށްފައިވަނީ 2022 ވަނަ އަހަރުގެ އޮކްޓޯބަރުމަހުގެ 20 ވަނަ ދުވަހު އެވެ. އެފަހަރު ޖާހް ކުންފުނިން ބުނެފައިވަނީ، ކުރިއަށްދަނީ ފިނިޝިން މަސައްކަތްތަކަމަށާއި ކުރިއަށް އޮތް އަހަރުގެ ފެބުރުއަރީމަހު ފްލެޓްތައް ހަވާލުކުރަން ފަށާނޭ ކަމަށެވެ.
Advertisement
This content is created and paid for by advertisers and does not involve Voice Journalists
