ފެނަކަ ކޯޕަރޭޝަނުން އަމިއްލަ ކުންފުންޏަކަށް 28 މިލިއަން ރުފިޔާ ދައްކަން ސިވިލްކޯޓުން ހުކުމެއް ކޮށްފިއެވެ.

ސިވިލްކޯޓުން އިއްޔެ މި ހުކުމް ކޮށްފައިވަނީ، ފެނަކައިން އަމިއްލަ ކުންފުންޏެއް ލައްވައި މަސައްކަތްކުރުވުމަށްފަހު ދޭންޖެހޭ 31 މިލިއަނަށްވުރެ ގިނަ ރުފިޔާ ނުދީގެން ކޯޓަށް ހުށަހެޅި މައްސަލާގައެވެ. މި މައްސަލަ ހުށަހެޅީ ދިމަހް ނަމަކަށްކިޔާ ކުންފުންޏަކުންނެވެ. 

މި މައްސަލާގައި ދިމަހް ކުންފުނިން ދައުވާކޮށްފައިވަނީ، އެކުންފުންޏާއި ފެނަކައާ ދެމެދު 2022 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް އެކިފަހަރުމަތިން ހެދިފައިވާ އެއްބަސްވުންތަކުގެ ދަށުން ދިމަހް ޕްރައިވެޓް ލިމިޓެޑުން ފެނަކައަށް ކޮށްދީފައިވާ މަސައްކަތްތަކުގެ އަގަށް އަރާފައިވާ ޖުމްލަ 31.1 މިލިއަން ރުފިޔާ، ދެއްކުމަށް ތަކުރާރުކޮށް އެދުމުންވެސް ފައިސާ ދައްކާފައި ނުވުމުންނެވެ. 

މި މައްސަލާގައި ފެނަކައިން މިއަދާހަމަޔަށް އާއިރު އެކުންފުންޏަށް ދައްކާފައިވަނީ، 3 މިލިިއަން ރުފިޔާއެވެ. ކޯޓުން ހުކުމްކޮށްފައިވަނީ މިހާތަނަށް ފެނަކައިން ނުދައްކާ އޮތް 28.1 މިލިއަން ރުފިޔުާ 11 މަސްދުވަހަށް ބަހާލައިގެން ދެއްކުމަށެވެ. އެއީ ކޮންމެ މަހަކުވެސް 2.5 މިލިއަން ރުފިޔާއަށްވުރެ މަދުނޫން އަދަދެއް ސިވިލް ކޯޓަށް ދައްކައިގެން ދަރަނި ހަލާސްކުރާ ގޮތަށެވެ.

ފެނަކައަކީ ސަރުކާރުގެ ކުންފުނިތަކުގެ ތެރެއިން އެންމެބޮޑު ދަރަންޏެއް އޮތް ކުންފުންޏެވެ.