ސަރުކާރުން ކަންކަން ޢިއުލާންކުރަނީ، ކުއްލިއަކަށް އެއްވެސް ކަމެއް ނުބައްލަވައި ނޫންކަމަށާއި، އޭގެ ބަދަލުގައި ކަންކަން ޢިއުލާންކުރައްވަނީ، އެ ކަންކަން ރާވައި އެކަންކަން ކުރުމަށް މަޝްވަރާކުރުމަށްފަހު، އެކަންކަން ކުރެވޭނެ ގޮތްތައް ކަނޑައަޅައިގެންކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ހއ މުރައިދޫ ރައްޔިތުންނާ ބައްދަލު ކުރައްވައި ވާހަކަދައްކަވަމުން ރައީސް މުޢިއްޒު ވިދާޅުވީ، ރަށްރަށަށް ވަޑައިގެން އެ ރަށްރަށުގެ ރައްޔިތުންގެ ހާލަތު ވަރަށް ގާތުން އެމަނިކުފާނު ބައްލަވަމުންދާ ކަމަށެވެ. އަދި ރަށްރަށަށް ވެވަޑައިގެންނެވި ވަޢުދުތައް ބާރުސްޕީޑްގައި ފުއްދެވުމަށް ރައްޔިތުންނާއި މަޝްވަރާ ކުރައްވާ ކަމަށާަ، އެއަށްފަހު އެކަންކަން ކުރެވޭނެ ގޮތްތައް ހާމަކުރައްވަމުންދާ ކަމަށް ވިދާޅުވިއެވެ. 

ކަންމިހެން ހުރި ނަމަވެސް، މި ދަތުރުތަކުގައި އެމަނިކުފާނު ރައްޔިތުންނަށް ވެވަޑައިގަންނަވަމުން އަންނަ ވަޢުދުތަކާއި ގުޅުވައި ބައެއް ފަރާތްތަކުން ފާޑުކިޔަމުންދާ ކަން ރައީސް މުޢިއްޒު ފާހަގަކުރެއްވިއެވެ. އެގޮތުން، އެފަދައިން އެމަނިކުފާނު ވައުދުވެވަޑައުގަންނަވަނީ އެއްވެސް ޕްލޭނެއް ނުވަތަ ބަޖެޓެއްވެސް ނެތި ކަމަށް އެފަރާތްތަކުން ބުނަމުންދާ ކަމަށް ވިދާޅުވުއެވެ. 

”ނޫން އެހެންނެއް ނޫން. ވަރަށް ސާފުކޮށް ސަރުކާރުގެ ކަންކަން އަޅުގަނޑު އަބަދުވެސް ހާމަކުރަން. ކެންޕެއިންގައި ވީވައުދުތައް އެވަނީ ފޮތެއްގައި ލިޔެފައި. ސަރުކާރުގެ ކަންކަން ތަރުތީބު ކުރެވިގެންދާގޮތް ވަރަށް ސާފުކޮށް އެކި ބައްދަލުވުންތަކުގައު އަދި ލިޔެކިޔުމުން ހާމަކުރަން….“ ރައީސް މުޢިއްޒު ވިދާޅުވިއެވެ. 

މީގެ އިތުރުން، މުރައިދޫގެ ތަރައްޤީއަށް ރާއްވަވާފައިވާ ކަންކަމަށް އަލިއަޅުއްވައިލައްވައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، މުރައިދޫއަށް އެންމެ މުހިންމީ ބަނދަރުގެ މަޝްރޫޢުކަމަށެވެ. އެހެންކަމުން ބޭރުތޮށީގެ މައްސަލަ ހައްލުކުރުމަށްފަހު، މަގު ހެދުމަށް ވެވަޑައިގެންނެވި ވަޢުދު މި ދައުރުތެރޭގައި ފުއްދަވާނެކަމުގައި އެމަނިކުފާނު ވިދާޅުވިއެވެ.

އަދި ރަށުގެ އާބާދީއަށް އެކަށީގެންވާވަރަށް، ހަމަހަމަ ގޮތެއްގައި ޞިއްޙީ ޚިދުމަތް، ކޮންމެ ރައްޔިތަކަށްވެސް ލިބުމަށް، އެމަނިކުފާނު އެދިވަޑައިގަންނަވާކަމުގައި ފާހަގަކުރައްވައި، އެކަންވެސް ކުރައްވާނެކަމުގައި ވިދާޅުވިއެވެ.

މިއާއެކު، ސްކޫލަށް ބޭނުންވާނެ ކަންކަންވެސް ތަރުތީބުކުރައްވައިގެން ކުރިއަށްގެންދަވާނެ ކަމުގައި އެމަނިކުފާނު ވިދާޅުވިއެވެ.

މީގެ އިތުރުން ދުޅަހެޔޮ ޞިއްޙަތަކަށް ބޭނުންވާ، ކުޅިވަރުގެ ދާއިރާވެސް، މުރައިދޫގައި ކުރިއެރުވުމަށް ރާއްވަވައިގެން ސަމާލުކަންދެއްވާ ތަރުތީބުން ކުރައްވާނެކަމުގައި އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާ ރައްޔިތުންނާ ބައްދަލުކުރެއްވުމުގެ ކުރިން ވަނީ މުރައިދޫގައި އަލަށް އިމާރާތްކުރެވޭ ފުލުހުންގެ މަރުކަޒުގެ ބިންގާ އަޅުއްވައިދެއްވުމުގެ ރަސްމިއްޔާތާއި އައު ކައުންސިލް އިދާރާގެ ބިންގާ އަޅުއްވައިދެއްވުމުގެ ރަސްމިއްޔާތުގައި ބައިވެރިވެވަޑައިގެންފައެވެ.

ރައީސުލްޖުމްހޫރިއްޔާ ރައްޔިތުންނާ ބައްދަލުކުރެއްވުމުގެ ރަސްމިއްޔާތުގައި، ބޭންކް އޮފް މޯލްޑިވްސް އިން ކުރިއަށްގެންދާ، މުރައިދޫގައި އޭ.ޓީ.އެމް ބެހެއްޓުމުގެ މަސައްކަތް، ރަސްމީ ގޮތުން ރަށު ކައުންސިލާ ހަވާލުކުރައްވާފައިވެއެވެ.