އިދިކޮޅު އެންމެ ބޮޑު ޕާޓީ، އެމްޑީޕީން ހުޅުމާލޭގައި ޖަލްސާ ބޭއްވުމަށް ތަން ހަމަޖެހުނުކަން އެޗްޑީސީން އެޕާޓީއަށް އަންގައިފިއެވެ.

އެމްޑީޕީއަށް ހުޅުމާލޭގައި ޖަލްސާ ބޭއްވުމަށް ތަން ހަމަޖެހުނުކަން އެޕާޓީއަށް އަންގާފައިވާކަން އެޗްޑީސީގެ މީޑިއާ އޮފިޝަލް ވަނީ ވޮއިސްއަށް ޔަގީންކޮށްދީފައެވެ. އެޗްޑީސީގެ މީޑިއާ އޮފިޝަލް ވިދާޅުވީ, މިމަހުގެ 29 ވަނަ ދުވަހުގެ ރޭ އެމްޑީޕީގެ ޖަލްސާ ބޭއްވުމަށް ރުއްގަނޑު 1 ހަމަޖެހުނުކަން އެޕާޓީއަށް މިހާރު އަންގާފައިވާކަމަށެވެ. 

މިދިޔަ ހަފްތާގައި އެމްޑީޕީގެ ޖަލްސާ ބާއްވަން ހުއްދަ ނުލިބުނު ސަބަބެއްކަމަށް އޮފިޝަލް ވިދާޅުވީ، ހުޅުމާލޭގައި އިވެންޓްތައް ބޭއްވުމަށް ހާއްސަކޮށްފައިވާ ސަރަހައްދުތަކަކީ ވަކި އުސޫލްތަކެއްގެ ދަށުން ދޫކުރަމުންދާ ތަންތަން ކަމަށެވެ. މިގޮތުން އިވެންޓްތައް ބާއްވަން ހުށަހަޅާ ފަރާތްތަކަށް ތަންތަން ދޫކުރަނީ ހުށަހަޅާ ތަރުތީބުން ކަމަށެވެ. އެމްޑީޕީން ޖަލްސާ ބާއްވަން އެދުނުތަން އޭރު ދޫނުކުރެވުނީ ބަޔަކު އެތަން ނަގާފައި އޮތުމުންކަމަށާއި، އެތަނުން ޖާގަ ލިބުނުން އެމްޑީޕީއަށް އެކަން އަންގާފައިވާކަމަށް އޮފިޝަލް ވިދާޅުވިއެވެ.

Advertisement

އޭނާ ވިދާޅުވީ ހުޅުމާލޭގެ މަގުތަކުގައި ބެނާތައް ދެމުމާއި ޜޯޑްޝޯތައް ބޭއްވުމުގެ ހުއްދައަކީ ހަމަޖެހިފައިވާ އުސޫލުން ހަމަ ކޮންމެ ބަޔަކަށްވެސް ހުއްދަ ދޭ ކަންކަން ކަމަށާއި، އެކަމުގައި އެޗްޑީސީން ވަކިބަޔަކަށް ވަކިގޮތެއް ހަމަޖައްސައިދެމުން ނުދާކަމަށެވެ. 

އެމްޑީޕީ ޖަލްސާ ބޭއްވުމަށް ތަން ހަމަޖެހުނުކަން އެޗްޑީސީން އަންގާފައިވާއިރު، އެޕާޓީން އެންމެ ފުރަތަމަ މަސައްކަތްކުރީ މިމަހުގެ 21 ވަނަ ދުވަހު ހުޅުމާލޭގައި ޖަލްސާއެއް ބޭއްވުމަށެވެ. ނަމަވެސް ޖަލްސާ ބެއްވުމުގެ ހުއްދަ އެޗްޑީސީން ދީފައިނުވާކަމަށް ބުނެ، އެމްޑީޕީން ވަނީ އެދުވަހުގެ ޖަލްސާ ކެންސަލްކޮށްފައެވެ. އެދުވަހު ޖަލްސާ ނުބޭއްވުމުން އެމްޑީޕީން ވަނީ އެޗްޑިސީއަށް ވަރަށްބޮޑަށް ފާޑުކިޔާފައެވެ. އެގޮތުން އެއީ ސަރުކާރުން ސުލްހަވެރި ސިޔާސީ ހަރަކާތްތަކަށް ސީދާ ހުރަސްއެޅުމަށް ކުރިކަމެއްކަމަށް އެމްޑީޕީން ވަނީ ބުނެފައެވެ.