އިފުރު މޯލްޑިވްސްގައި މަސައްކަތްކުރާ 26 އަހަރުގެ އިންޑިއާ ރައްޔިތެއް މޫދުން ގެއްލިގެން ހޯދުމުގެ މަސައްކަތް ކުރާތާ ތިން ދުވަސްވީއިރުވެސް އަދިވެސް ނުފެންނަ ކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން ބުނީ މި މަޢުލޫމާތު އެމްއެންޑީއެފް ނޮދަން އޭރިއާ ކޮމާންޑް، ކޯސްޓްގާޑް ފަސްޓް ސްކޮޑްރަންގެ ސަރޗް އެންޑް ރެސްކިޔު ސެންޓަރ - އުލިގަމް ޕޯސްޓަށް ލިބިފައިވަނީ 27 ޖަނަވަރީ 2024 ވަނަ ދުވަހުގެ 16:41 ގައި ކަމަށެވެ.
އަދި މަޢުލޫމާތު ލިބުމާއެކު، ކޯސްޓްގާޑް ފަސްޓް ސްކޮޑްރަންއިން ވަނީ ހޯދުމުގެ މަސައްކަތް ފަށާފައި ކަމަށާ 29 ޖަނަވަރީއާ ހަމައަށް، ގެއްލުނު މީހާ ހޯދުމަށް ފުޅާ ދާއިރާއެއްގައި މަސައްކަތްތަކެއް ކުރެވިފައިވާ ކަމަށް އެ އިދާރާއިން ބުނެއެވެ.
އެގޮތުން، ކަނޑުމަގުން 74.18 ސްކެއަރ ނޯޓިކަލް މޭލް ބެލުމަށް ކޯސްޓްގާޑް ފަސްޓް ސްކޮޑްރަންގެ ހާބަރ ކްރާފްޓާއި ސީ އެމްބިއުލާންސް އަދި ޕޮލިސް ސަރވިސްގެ އެހީތެރިކަން ހޯދާފައިވާ ކަމަށް ބުންޏެވެ.
މީގެ އިތުރުން، ކޯސްޓްގާޑްގެ ޑައިވަރުންނާއި އިފުރު މޯލްޑިވްސް ރިސޯޓް މުވައްޒަފުންގެ އެހީތެރިކަމާއެކު 160,718 ސްކެއަރ މީޓަރ ސަރަޙައްދެއްގައި ޑައިވްކޮށްގެން ބަލާފައިވާއިރު، ކޯސްޓްގާޑްގެ ޑައިވަރުން ސްނޯކެލް ކޮށްގެން 46,814 ސްކެއަރ މީޓަރ ސަރަޙައްދެއް ބަލާފައިވާ ކަމަށް ބުނެފައިވެއެވެ.
ހަމަ އެހެންމެ، ވައިގެ މަގުންވެސް 213 ސްކެއަރ ނޯޓިކަލް މޭލްގެ ސަރަޙައްދެއް ބަލާފައިވާކަމަށް އެމްއެންޑީއެފްއިން މަޢުލޫމާތު ދީފައިވެއެވެ.
Advertisement
This content is created and paid for by advertisers and does not involve Voice Journalists
