ޤަވާއިދާ ހިލާފަށް އުޅެމުންދާ ބިދޭސީން ހޯދުމަށް އިމިގްރޭޝަނުން ކ.އަތޮޅު ހުރާގައި ހިންގި އޮޕަރޭޝަނުގައި އުސޫލާ ހިލާފަށް އުޅުނު ގިނަ އަދަދެއްގެ ބިދޭސީންތަކެއް އެ އިދާރާގެ ބެލުމުގެ ދަށަށް ގެންގޮސްފިއެވެ. 

އިމިގްރޭޝަނުން ބުނީ ރަށްރަށުގައި ގަވާއިދާ ހިލާފަށް އުޅޭ ބިދޭސީން ބަލައި ފާސްކުރުމަށް، އިއްޔެ ހެނދުނު 6:00 އިން ހަވީރު 5:00 އަށް ޓާސްކުފޯހުން ކ. ހުރާގައި ހާއްސަ ރެއިޑު އޮޕަރޭޝަނެއް ކުރިއަށް ގެންގޮސްފައިވާކަމަށެވެ. މި އޮޕަރޭޝަނުގައި ހުރާގައި ގަވާއިދާ ހިލާފަށް އުޅެމުންދިއަ 46 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފައިވާކަމަށް އެ އިދާރާއިން ބުންޏެވެ.

ރާއްޖޭގައި ޤަވާއިދާ ހިލާފަށް އުޅެމުންދާ ބިދޭސީން ހޯދުމަށް އިމިގްރޭޝަނުން އަންނަނީ ސަރުކާރުގެ ކަމާބެހޭ އިދާރާތަކާ ގުޅިގެން ހާއްސަ އޮޕަރޭޝަނެއް ހިންގަމުންނެވެ. މި އޮޕަރޭޝަނުގެ ދަށުން މާލެ އަދި ހުޅުމާލޭގައި ނުގަވައިދުން އުޅުނު ގިނަ އަދަދެއްގެ ބިދޭސީން އިމިގްރޭޝަނުގެ ބެލުމުގެ ދަށަށް ވަނީ ގެންގޮސްފައެވެ. މިގޮތުން އިމިގްރޭޝަނުގެ ބެލުމުގެ ދަށަށް ގެންދެވުނު ބައެއް މީހުން ވަނީ ޑީޕޮތްވެސްކޮސްފައެވެ.

މާލޭގައި މި އޮޕަރޭޝަން ފުޅާކުރުމާއެކު ބިދޭސީން ވަނީ އަތޮޅުތެރޭގެ ރަށްތަކަށް މިސްރާބުޖަހާފައެވެ. އެގޮތުން އިމިގްރޭޝަނުން ވަނީ އަތޮޅުތެރޭގެ ރަށްތަކުގެ ތެރެއިން ބިދޭސީން އެންމެގިނައިން ގޮސް އުޅޭ ރަށްތަކަށް އޮޕަރޭޝަން ފުޅާކޮށްފައެވެ.