ރައްޔިތުންގެ މަޖިލީހުގެ މާމިމިގިލީ ދާއިރާގެ މެންބަރު ޤާސިމް އިބްރާޙީމްގެ ޙަޔާތްޕުޅަށް އަލިއަޅުވާލައި ލިޔެފައިވާ ބަޔޮގްރަފީ ފޮތް ނެރުމަށް ތައްޔާރު ވެއްޖެއެވެ. 

މި ފޮތް ނެރުމަށް ހަމަޖެހިފައިވަނީ މިމަހުގެ 10 ވަނަ ދުވަހުއެވެ. މި ބައޮގްރަފީ ލިޔުއްވާފައިވަނީ ރާއްޖޭގައި ބައޮގްރަފީ ލިޔުމުގެ ދާއިރާއިން ކުރިއަރަމުން އަންނަ ލިޔުންތެރިއެއްކަމުގައިވާ މުޙައްމަދު ޖަމީލެވެ. ފޮތް ޗާޕުކުރެވިފައިވަނީ ހާޑް ކަވަރުގައެވެ.

މި ބައޮގްރަފީގައި އޮނަރަބްލް ގާސިމް އިބްރާހީމްގެ ޙަޔާތްޕުޅުގައި ކުރިމަތިލައްވަން ޖެހިވަޑައިގެންނެވި މައިގަނޑު ހުރިހާ ކަމަކަށް އަލިއަޅުވާލެވިފައިވެއެވެ. އެގޮތުން، އެމަނިކުފާނުގެ ކާމިޔާބީތަކާއި، ނާކާމިޔާބީތަކާއި، ދަރުމަވެރި ޚިދުމަތްތަކާއި، ވިޔަފާރިއާއި، އިޖްތިމާޢީ ގުޅުންތަކާއި، އާއިލީ ދިރިއުޅުމާ ގުޅޭގޮތުން ދިމާވެފައިވާ ކަންކަމާއި، ސިޔާސީ ގޮތުން ރާއްޖެއަށް އައިސްފައިވާ ބޮޑު ބަދަލުގައި ތަޖުރިބާ ކުރައްވަން ޖެހިވަޑައިގެންނެވި ކަންކަން އެއްވެސް ފޮރުވުމެއްނެތި ވަރަށް ތަފްޞީލީ ގޮތެއްގައި ހާމަކުރައްވާފައިވެއެވެ.

ފޮތް ނެރުއްވުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ ފެބްރުއަރީ 10 ވަނަ ދުވަހު ވިލާ ކޮލެޖުގައެވެ. އެ ރަސްމިއްޔާތުގައި ބައޯގްރަފީގެ އޯޑިއޯ އަދި ވީޑިއޯ ކްލިޕްތަކާއެކު ބައޯގްރަފީ ހިމެނޭ ވެބްސައިޓެއް އިފްތިތާޙު ކުރުމަށްވެސް ހަމަޖެހިފައިވެއެވެ. މީގެ އިތުރުން، ގާސިމްގެ ހަޔާތްޕުޅު ކުރު ގޮތަކަށް ދައްކައިދޭ ފޮޓޯ މައުރަޒެއް އެރޭ ވިލާ ކޮލެޖުގައި ހުޅުވޭނެއެވެ.

މި ފޮޓޯ މައުރަޒު އާންމުންނަށް ޖެހިގެން އަންނަ ދުވަހުގެ ހެނދުނު 9:00 އިން ރޭގަނޑު 10:30 އާ ހަމައަށް ހުޅުވާލެވިފައި ހުންނާނެއެވެ. ފޮޓޯ މައުރަޒަށް ޒިޔާރަތްކުރައްވާ ފަރާތްތަކަށް ބައޯގްރަފީގެ ކޮޕީއެއް ހިލޭ ދޭ ގޮތަށް ވަނީ ހަމަޖެހިފައެވެ.

ގާސިމް އިބްރާހީމަކީ އެމަނިކުފާނުގެ ޒުވާން އުމުރުން ފެށިގެން، މެދުކެނޑުމެއްނެތި ދިވެހިރާއްޖޭގެ ތަރައްޤީއަށާއި، ވިޔަފާރިއަށާއި، އިޤްތިޞާދަށް އަގުހުރި ޚިދުމަތްތަކެއް ކުރައްވަމުން ގެންދަވާ ބޭފުޅެކެވެ. ޤާސިމްގެ ދަރުމަވެރި ޚިދުމަތްތަކަކީ، ރާއްޖޭގައި އަމިއްލަ ފަރުދަކު މިހާތަނަށް ފޯރުކޮށްދެމުންދާ އެންމެ ފުޅާ ދާއިރާގެ ދަރުމަވެރި ޚިދުމަތްތަކެވެ.

ވޭތުވެދިޔަ ފަންސާހަކަށް އަހަރު ދުވަހުގެ ތެރޭގައި ދިވެހިރާއްޖެއަށް އައިސްފައިވާ އަދި އަންނަމުންދާ ތަރައްޤީގައި ޤާސިމްގެ ހިއްސާ ފާހަގަކޮށްލެވޭ މިންވަރަށް ބޮޑެވެ. އެބޭފުޅާ ކުރައްވާފައިވާ ތަޖުރިބާތައް ގިނަގުނައެވެ. ބިނާކުރެއްވި ދިވެހި ތަޢުލީމީ ޖީލު ފުޅާވެގެންވެއެވެ. ދިވެހިރާއްޖޭގެ ޑިމޮކްރެޓިކް ޙަޔާތުގައި ގާސިމް އިބްރާހީމް ކުރައްވާފައިވާ މަސައްކަތްޕުޅުތަކަކީވެސް އާރާސްތު މަސައްކަތްޕުޅުތަކެކެވެ.

ރާއްޖެއަށް ޑިމޮކްރަސީ ތަޢާރަފްކުރުމަށް އެކުލަވާލެވި، ފާސްކުރެވި، ޢަމަލުކުރެވެމުންދާ ޤާނޫނުއަސާސީއަކީ އެބޭފުޅާ ރައްޔިތުންގެ ޚާއްޞަ މަޖިލީހުގެ ރިޔާސަތުގައި އިންނަވައިގެން، ކުރިމަތިވެވަޑައިގެންނެވި ގޮންޖެހުންތަކާއެކު ޙާޞިލުކުރެއްވި ނަތީޖާއެކެވެ. އަދި މި ވޭތުވެދިޔަ އަހަރުތަކުގައި އެ ޤާނޫނުއަސާސީއާއި ޑިމޮކްރަސީއާއި ދިވެހިރާއްޖޭގެ މިނިވަންކަމުގެ ދިފާޢުގައި، އެއްވެސް ފަސްޖެހިވަޑައިގަތުމެއްނެތި ކުރިއަށް ނުކުމެވަޑައިގެން ކުރައްވާފައިވާ މަސައްކަތްޕުޅުތަކަކީވެސް، ފާހަގަކުރެވިގެންދާ މުހިންމު އަދި ބުރަދަން ހުރި މަސައްކަތްޕުޅުތަކެކެވެ.