ރޯޝަނީމަގުގައި ހުންނަ ކެފޭއަކާއި ގެއެއްގެ ޖަންކްޝަންހޮޅި ކާނުތެރެއަށް ދޫކޮށްލާފައި ހުރިކަން ފާހަގަކުރެވިގެން މާލެސިޓީ ކައުންސިލާއި އެމްޑަބްލިއުއެސްސީ ގުޅިގެން އެ މައްސަލަ ހައްލުކުރުމުގެ މަސައްކަތް ފަށައިފިއެވެ.

ރޯޝަނީމަގު ކާނުގަނޑުން ނުބައިވަސްދުވާތީވެ، އާއްމުން ޝަކުވާކުރަމުންދާތާ ގިނަ ދުވަސްތަކެއް ވެފައިވާއިރު، މާލެސިޓީ ކައުންސިލުން މިހާރު ވަނީ އެމަގުގެ ކާނުތެރެއިން ނުބައިވަސްދުވަން މެދުވެރިވާ ސަބަބު ހޯދާފައެވެ. މާލެސިޓީ ކައުންސިލުން ވަނީ ރޯޝަނީމަގުގެ ކާނުތަކުން ނުބައިވަސްދުވާތީވެ، އެކި ފަހަރުމަތިން ކާނުތައް ސާފުކޮށްފައެވެ. ނަމަވެސް އެ މައްސަލަ ހައްލުނުވެ ދިގުލައިގެން ދިއުމުން ކައުންސިލުން ވަނީ ރޯޝަނީމަގުގެ ދެފަށީގެ ކާނުތައް ބަލައި ނުބައިވަސް ދުވަން މެދުވެރިވާ ސަބަބު ދެނެގަނެފައެވެ.

މިކަމާ ގުޅޭގޮތުން ނުސްވެރިންނާ ވާހަކަދައްކަވަމުން މާލެސިޓީ ކައުންސިލްގެ މޭޔަރު އާދަމް އާޒިމް ވިދާޅުވީ، ރޯޝަނީމަގުގެ ކާނުގަނޑުތެރެއިން ނުބައިވަސް ދުވަނީ އެމަގުގައި ހުންނަ ކެފޭއަކާއި ގެއެއްގެ ޖަންކްޝަންހުޅި ކާނުތެރެއަށް ދޫކޮށްލާފައި ހުރުމުން ކަމަށެވެ.

ޖަންކްޝަން ފެންގަނޑު ކާނުތެރެއަށް އަންނަގޮތަށް ދޫކޮށްލާފައި... ފޮޓޯ: މާލެ ސިޓީ ކައުންސިލް

އާޒިމް ވިދާޅުވީ އެ މައްސަލަ ހައްލުކުރުމަށް މަސައްކަތް ފަށާފައިވާކަމަށާއި، އެގޮތުން ކެފޭ ބަންދުކުރަން އަންގައި އެގެއިްނ މީހުންވެސް ހުސްކުރަން އަންގާފައިވާނޭކަމަށެވެ.

އާޒިމް ވިދާޅުވީ ކެފޭއަށް ދެން ހުއްދަ ދޭނީ ޖަންކްޝަން އެ އޮންނަ އުުލުގެ މަތިން ހަދައި ރަނގަޅުކުރުމުންކަމަށް ކަމާބެހޭ އިދާރާއަށް އަންގާފައިވާނޭކަމަށެވެ. 

އާޒިމް ވިދާޅުވީ ރޯޝަނީމަގު ކާނުތަކުން އެހާ ނުބައިވަސް ދުވަނީ ގޭގެ ޖަންކްޝަނުން ދޫކުރާ ނަޖިސްފެނާއި، ކެފޭއިން އަޅާ ތެއޮފަދަ ތަކެތި އެއްވެ ކާނުތެރެއަށް އެޅުމުންނެވެ. އެތަކެތި އެޅިފައިވަނީ ކޭބަލް ޖަންކްޝަންތަކަށް ކަމަށްވެސް އާޒިމް ވިދާޅުވިއެވެ. މޭޔަރު ވަނީ މިފަދަ ކަމެއް ހިނގިނަމަވެސް ކަމާބެހޭ އިދާރާތަކަށް އެކަންކަން ރަނގަޅަށް ސާފުކޮށްދިނުމަށް އެދިފައެވެ.