ދާދިފަހުން އެއްކޮށްލި ދެ ވުޒާރާކަމަށްވާ، މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓްގެ ޕާމަނަންޓް ސެކެރެޓަރީކަމުގެ މަޤާމަށް މީހަކު ހޯދުމަށް އިއުލާނުކޮށްފިއެވެ.

މިކަމާ ގުޅޭގޮތުން ސިވިލްސާވިސް ކޮމިޝަނުން އާއްމުކޮށްފައިވާ އިއުލާނެއްގައި ބުނެފައިވަނީ ސިވިލް ސަރވިސްގެ ގަވާއިދުގެ 29 ވަނަ މާއްދާގައިވާ ގޮތުގެ މަތިން، މިނިސްޓްރީ އޮފް ޓޫރިޒަމް އެންޑް އެންވަޔަރަމަންޓަށް ޕަރމަނަންޓް ސެކްރެޓަރީއަކު ހަމަޖެއްސުމަށްޓަކައި، އެ މަޤާމަށް ޝައުޤުވެރިވާ ފަރާތްތަކަށް ކުރިމަތިލުމުގެ ފުރުޞަތު ޢާންމުކޮށް ހުޅުވާލާފައިވާކަމަށެވެ. މަޤާމަށް ކުރިމަތިލުމަށް އެދޭ ފަރާތްތަކަށް ފުރުސަތު ހުޅުވާލާފައިވަނީ މިހިނގާ ފެބުރުއަރީމަހުގެ 11 ވާ އަންގާރަ ދުވަހުގެ މެންދުރުފަހު 14:00 ގެ ކުރިންނެވެ.

މަޤާމަށް ކުރިމަތިލުމުގެ އަސާސީ ޝަރުތުތަކުގެ ތެރޭގައި ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑުން ދަށްވެގެން ލެވެލް 7 ގެ ސަނަދެއް ޙާޞިލުކޮށްފައިވުމާއެކު؛ ސަރުކާރުގައި، ނުވަތަ ޕަބްލިކް، ޕްރައިވެޓް ނުވަތަ ޤައުމީ ނުވަތަ ބައިނަލްއަޤުވާމީ ޖަމްޢިއްޔާ ނުވަތަ ޖަމާޢަތެއްގެ ހިންގުމުގެ ދާއިރާގައި މަދުވެގެން 6 އަހަރު ދުވަހު މަސައްކަތްކޮށް ތަޖުރިބާ ލިބިފައިވުން ހިމެނެއެވެ.

Advertisement

ޕާމަނަންޓް ސެކެެރެޓަރީންގެ އުޖޫރައަކީ އަސާސީ މުސާރައިގެ ގޮތުގައި ކަނޑައެޅިފައިވާ 20،500.00 ގެ އިތުރުން ލިވިން އެލަވަންސްގެ ގޮތުގައި ކަނޑައެޅިފައިވާ 15،000 ރުފިޔާއެވެ.

މިހާތަނަށް ވަކިން ހިންގަމުން އައި ދެ ވުޒާރާ ކަމަށްވާ، ޓޫރިޒަމް އާއި ތިމާވެއްޓާބެހޭ ވުޒާރާ އެއް ވުޒާރާއެއްގެ ގޮތުގައި ހިންގެވުމަށް ރައީސުލްޖުމްހޫރިއްޔާ ނިންމަވައި އެކަން ހާމަކޮށް އެ ވުޒާރާއަށް ވަޒީރަކު އައްޔަނުކުރެއްވީ، މިދިޔަ ހޮނިހިރުދުވަހުއެވެ. މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓްގެ މަޤާމަށް އައްޔަނުކުރެއްވީ، ތިމާވެއްޓާބެހޭ ވުޒާރާގެ މިނިސްޓަރަކށް ހުންނެވި، ތޯރިގް އިބްރާހީމް އެވެ. ދެ ވުޒާރާ އެއްކޮށްލުމަށްފަހު ތޯރިގް އެމަޤާމަށް އައްޔަނުކުރެއްވީ ޓޫރިޒަމް މިނިސްޓަރަކަށް ހުންނެވި އިބްރާހިމް ފައިސަލް ވަކިކުރެއްވުމަށްފަހުއެވެ.