މިދިޔަ ހޮނިހިރު ދުވަހު ހެނދުނު ހުޅުމާލެ-މާލެ ބުރިޖު ހައިވޭގައި ހިނގި އެކްސިޑެނޓެއްގައި މީހަކު މަރުވި މައްސަލާގައި އިތުރު ސައިކަލެއް ޓޯކޮށް ދުއްވި މީހާގެ ލައިސެންސް ހިފަހައްޓާފައިވާ ކަމަށް ފުލުހުން މިއަދު ބުނެފި އެވެ.
ފުލުހުން ހޮނިހިރު ދުވަހު ބުނި ގޮތުގައި މި އެކްސިޑެންޓް ހިނގާފައި ވަނީ، ހައިވޭގެ ވާތް ފަރާތުގައި ޖަހާފައި ހުރި ސޯލާޕެނަލްތަކުގެ ކައިރީގައި ބަހައްޓާފައި ހުރި ކޯންތަކެއްގައި ސައިކަލެއް ޖެހިގެންނެވެ. އަދި އެ ސައިކަލު ދުއްވަން އެވަގުތު އިނީ ބަންގަލަދޭޝްގެ ފިރިހެނެއް ކަމަށާ، އޭނާ މަރުވެފައި ވަނީ، އެކްސިޑެންޓަށް ފަހު އައިޖީއެމްއެޗުގައި ފަރުވާ ދެމުންދަނިކޮށް. ކަމަށެވެ.
އެ މައްސަލައާއި ގުޅޭ އިތުރު މައުލޫމާތު ދެއްވަމުން ފުލުހުންގެ ތަރުޖަމާނު އަހުމަދު ޝިފާން މިއަދު ވިދާޅުވީ، އެ މައްސަލަ އާއި ގުޅިގެން 60 އަހަރުގެ އަންހެނަކާއި ސުވާލުކޮށްފައިވާ ކަމަށެވެ.
އަދި އޭނާގެ ލައިސެންސް ހިފަހައްޓައި ސައިކަލު ޓޯވ ކޮށްފައިވާ ކަމަށްވެސް ވިދާޅުވިއެވެ.
މި ހާދިސާގެ ސީސީޓީވީ ފޫޓޭޖުން އެނގޭ ގޮތުން، އެކްސިޓެންޓްގައި މަރުވި މީހާ މަގުމަތީގައި އޮއްވާ އޭނާގެ ގައިމަތިން އަންހެން މީހާގެ ސައިކަލު ދުއްވާފައިވެއެވެ.
މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.
Advertisement
This content is created and paid for by advertisers and does not involve Voice Journalists
