ދިވެހިންގެ އުފާވެރިކަން މިންކުރުމަށް އެކުލަވާލާ އޮނިގަނޑު މިއަހަރުގެ ތެރޭގައި އާންމުކޮށް ޕައިލެޓް ޕްރޮގްރާމް މިއަހަރުގެ ތެރޭގައި ފެށުމަށް މަސައްކަތް ކުރައްވަމުންދާކަމަށް ސިޓީތަކާއި އިދާރީ ދާއިރާތައް ހިންގުމާއި އާއްމު ޚިދުމަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

މާނަހުރި ގޮތެއްގައި ރާއްޖޭގެ ރަށްތަކުގައި ރައްޔިތުންގެ ހުރި އުފާވެރިކަން މިންކުރުމަށް "ހެޕިނެސް އިންޑެކްސް"ގެ ނަމުގައި ސަރުކާރުން ހާއްސަ މަސައްކަތެއް ފައްޓަވާފައިވާއިރު، މި އަހަރުތެރޭ އެ ތަންފީޒުކުރަން ފައްޓަވާނެ ކަމަށް ވަޒީރު ވަނީ މީގެ ކުރިން ވިދާޅުވެފައެވެ.

އެކަމާ ގުޅޭ އިތުރު މައުލޫމާތު ދެއްވަމުން ވަޒީރު ވިދާޅުވީ، މިއަހަރުގެ ތެރޭގައި އޮނިގަނޑު އެކުލަވާލާ ޕައިލެޓް ޕްރޮގްރާމް ކުރިއަށް ގެންދިޔުމަށް މަސައްކަތް ކުރައްވަމުންދާކަމަށެވެ. އަދި އަންނަ އަހަރުގެ ތެރޭގައި މި މިންގަނޑުން ރަށްރަށުގެ ޙާލަތު ބަލައި ވަޒަންކުރެވޭވަރަށް މިއަހަރު މަސައްކަތް ކުރިއަށްގެންދަވާނެކަމަށް ވަޒީރު ވިދާޅުވިއެވެ.

"އަޅުގަނޑުމެން މިބަލަނީ މިއަހަރުގެ ތެރޭގައި އޮނިގަނޑު އެއްކޮށް އާއްމުކޮށް އަދި މީގެ ޕައިލެޓް ޕްރޮގްރާމްތަކެއް މިއަހަރުގެ ތެރޭގައި ކުރިއަށްގެންދެވޭނެކަމަށް. ޕައިލެޓް ޕްރޮގްރާމަށްފަހު އަޅުގަނޑުމެނަށް އިތުރަށް ފުރިހަމަކަމެއް ގެނެވޭނީ ކޮންކަހަލަ ބަދަލުތަކެއްތޯ ގެންނަންޖެހެނީ އެނގޭނެ." ވަޒީރު ވިދާޅުވިއެވެ.

ހެޕިނެސް އިންޑެކްސްއަކިީ އެ ޤައުމެއްގައި ދިރިއުޅޭ ރައްޔިތުންގެ ދިރިއުޅުމަށް ބަލައި، އުފާވެރިކަން އޮތް ވަރު ދެނެގަތުމަށް ހަދާ އިންޑެކްސްއެކެވެ. ހެޕިނެސް އިންޑެކްސް އާންމުކުރުމަކީ މިހާރަކަށް އައިސް ދުނިޔޭގައި އާންމުކޮށް ކޮންމެ އަހަރަކު ކުރަމުން އަންނަ ކަމެކެވެ. އާންމުކޮށް ދުނިޔޭގައި މި ކަން ބަލައި އުޅެނީ 10 ދާއިރާއަކަށް ބަލައިގެންނެވެ. ދުނިޔޭގެ ހެޕިނެސް އިންޑެކްސްގައި މި ވަގުތު އެންމެ ކުރީގައި އޮތީ ފިންލެންޑެވެ.

ހެޕިނެސް އިންޑެކްސްގައި ބަލައިލާ ދާއިރާތައް:

1. ނަފުސުގެ ނުވަތަ ނަފުސާނީ ދުޅަހެޔޮކަން

2. ޖިސްމުގެ ނުވަތަ ޖިސްމާނީ ދުޅަ ހެޔޮކަން

3. ދިރިއުޅުމުގެ އެންމެހައި ދާއިރާތަކަށް ވަގުތު ދެވޭ މިންވަރު

4. ކަނަކަން ދަސްކުރުމަށާއި، ފަންނުވެރިކަމާއި، ޘަޤާފީ ކަންކަން ކުރުމަށް ފުރުޞަތުލިބުން.

5. މުޖުތަމައުގެ ގުޅުން ނުވަތަ އެއްބައިވަންތަކަން

6. އިޖުތިމާޢީ އެހީތެރިކަން

7. ތިމާވެށްޓާ ގުޅުން އޮންނަ މިންވަރު

8. ސަރުކާރާ މެދު ދެކޭ ގޮތް

9. ދިރިއުޅުމުގެ ފެންވަރު

10. ކުރާ މަސައްކަތްތަކަށް ހިތްހަމަޖެހުން ލިބޭ މިންވަރު