ވަކި ސިޔާސީ ޕާޓީއެއްގެ ސިޔާސީ މަންފާއަށް ”މިނިވަން ބަހުސް” ނަން ބޭނުންކޮށްގެން ނުވާނެ ކަމަށް މަންދު ކޮލެޖުގެ ޗެއާމަން އަދި ގާނޫނީ ވަކީލު އިބްރާހިމް އިސްމާއިލް (އިބްރާ) ވިދާޅުވެއްޖެއެވެ.
އެކި މައްސަލަތަކުގައި އާއްމުންނަށް ހުޅުވާލައިގެން "މިނިވަން ބަހުސް" ނަމުގައި ސިލްސިލާ ބަހުސް ތަކެއް ފަށަން ނިންމާފައިވާކަން ދަ ޑިމޮކްރެޓްސް އިން އިއުލާން ކުރުމާއި ގުޅިގެން އިބްރާ އެކްސްގައި ކުރެއްވި ޕޯސްޓެއްގައި ވިދާޅުވީ، "މިނިވަން ބަޙުސް" އަކީ 2004 ވަނަ އަހަރު، ރާއްޖޭގެ ކަންކަން އިޞްލާޙުކުރާން ނުކުތް، އެކި ސިޔާސީ ފިކުރުގެ، އެކި ގިންތީގެ، އެކި ޢުމުރުގެ މީހުން އެކުވެގެން ހިންގި އިޞްލާޙީ ޙަރަކާތެއްގެ ފެށުން ކަމަށެވެ.
”ވަކި ސިޔާސީ ޕާޓީއެއްގެ ސިޔާސީ މަންފާއަށް އެނަން ބޭނުންކުރުމަކީ ކޮށްގެންވާނޭކަމެއްނޫނެވެ.“ އިބްރާގެ ޕޯސްޓުގައި ވިދާޅުވިއެވެ.
މިނިވަން ބަހުސް އަކީ ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގައި އިއުލާނު ކުރި އިސްލާހީ އެޖެންޑާގައި ހިމެނޭ ހިޔާލު ފާޅުކުރުމުގެ މިނިވަންކަމާއި އެނޫން ވެސް އެހެންކަމަށް ފަހު ފެށުނު ހަރަކާތެކެވެ.
އެ މިނިވަންކަމާއެކު ސްކޫލުތަކާއި އާންމު އެހެނިހެން ހޯލްތަކުގައި ބާއްވަން ފެށި ސިޔާސީ ފޯރަމްތަކުގެ ތެރެއިން އެންމެ މަޝްހޫރުވެގެން ދިޔައީ "މިނިވަން ބަހުސް"ގެ ސިލްސިލާ އެވެ.
އެ ބަހުސްގެ ފޯރި ގަދަވެ، ސަރުކާރާ ދެކޮޅު އަޑުތައް ގަދަވާން ފެށުމާއެކު މައުމޫންގެ ވެރިކަމުގެ ފަހު ދައުރު ޖެހުނީ މިނިވަން ބަހުސް ހުއްޓާލާށެވެ. އެހެން ނަމަވެސް، އެކި ނަން ނަމުގައި ކާޑުތައް ފޮނުވައިގެން ވެސް އޭރު ސިޔާސީ އެއްވުންތައް ބޭއްވި އެވެ.
Advertisement
This content is created and paid for by advertisers and does not involve Voice Journalists
