މިއަހަރުގެ މިހާތަނަށް ސަރުކާރުގެ ހަރަދުތައް ކުޑަކަމަށް މާލީ ވުޒާރާގެ ހިސާބުތަކުން ދައްކައިފިއެވެ.

މާލީ ވުޒާރާއިން ނެރެ އާއްމުކޮށްފައިވާ ސަރުކާރުގެ ހަރަދުބަރަދު ހުރިގޮތް އަންގައިދޭ ތަފާސްހިސާބުތަކަށް ބަލާއިރު، މިދިޔަ ޖެނުއަރީމަހުގެ 23 ވަނަ ދުވަހުގެ ނިޔަލަށް، ސަރުކާރުން ކުރި ހަރަދުގެ ގޮތުގައި ރެކޯޑްކުރެވިފައިވަނީ، 846 މިލިއަން ރުފިޔާއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 414.4 މިލިއަން ރުފިޔާގެ ދަށްވުމެކެވެ. މިދިޔަ އަހަރުގެ މި މުއްދަތާ އަޅާބަލާއިރު، 414 މިލިއަން ރުފިޔާގެ ދަށްވުމެކެވެ. މިދިޔަ އަހަރުގެ މި މުއްދަތުގެ ތެރޭގައި ސަރުކާރުން ކުރި ހަރަދުގެ ޖުމްލައަކީ، 1.2 ބިލިއަން ރުފިޔާއެވެ.

މިއަހަރުގެ މިހާތަނަށް ސަރުކާރުން ކުރި ހަރަދުތަކަށް ބަލާއިރު، ރިކަރަންޓް ހަރަދު އުޅެނީ، 843 މިލިއަން ރުފިޔާގައެވެ. އެއީ މުސާރަ އާއި ޕެންޝަނަށް ހޭދަވި 152.7 މިލިއަން ރުފިޔާ އާއި އިދާރީ ހަރަދުތަކަށް ކުރި 690.3 މިލިއަން ރުފިޔާއެވެ. މިދިޔަ އަހަރުގެ މި މުއްދަތުގެ ތެރޭގައި ރިކަރަންޓް ހަރަދަށް 1.06 ބިލިއަން ރުފިޔާ ހޭދަވިއިރު، އިދާރީ ހަރަދުގެ ގޮތުގައި 1 ބިލިއަނަށްވުރެ ގިނަ ރުފިޔާ ހޭދަވިއެވެ.

އަހަރުގެ މިހާތަނަށް ދައުލަތަށް އާމްދަނީގެ ގޮތުގައި 1.3 ބިލިއަން ރުފިޔާ ލިބުނުއިރު މީގެ ތެރޭގައި ހިމެނެނީ ޓެކްސްގެ ގޮތުގައި ލިބުނު 1.05 ބިލިއަން ރުފިޔާ އާއި ޓެކްސް ނޫން އާމްދަނީގެ ގޮތުގައި ލިބުނު 275 މިލިއަން ރުފިޔާއެވެ. މިދިޔަ އަހަރުގެ މި މުއްދަތުގެ ތެރޭގައި އާމްދަނީގެ ގޮތުގައި 1.5 ބިލިއަން ރުފިޔާ ލިބުނުއިރު، އޭގެ ތެރޭގައި ހިމެނެނީ ޓެކްސްގެ ގޮތުގައި ލިބުނު 1.2 ބިލިއަން ރުފިޔާ އާއި ޓެކްސްނޫން އާމްދަނީގެ ގޮތުގައި ލިބުނު307 މިލިއަން ރުފިޔާއެވެ.

އަހަރުގެ މިހާތަނަށް ސަރުކާރުގެ ހަރަދުތައް ކުޑަކަމަށް މާލީ ވުޒާރާގެ ތަފާސްހިސާބުތަކުން ދައްކާއިރު، ސަރުކާރުން ވަނީ ހަރަދުތައް ކުޑަކުރުމަށް ފިޔަވަޅުތަކެއް އަޅާފައެވެ. މީގެ ތެރޭގައި ވެރިންގެ މުސާރަތައް ކުޑަކުރުމާއި، ހަރަދުކުރުމުގައި އުފެއްދުންތެރިނޫން ހަރަދުތައް ކުރުން ހިފެހެއްޓޫން ހިމެނެއެވެ. މީގެ އިތުރުން ބޭރުން ބޭސް ގެނައުމުގެ އުސޫލާއި، ސަބްސިޑީގެ ގޮތުގައި ބޭރުގެ މާލީ އިދާރާތަކުން ލަފާދީފައިވާ ގޮތަށް ފިޔަވަޅުތައް އެޅުމަށްވެސް ސަރުކާރުން ވަނީ މަސައްކަތް ފަށާފައެވެ.