ކ. ގުރައިދޫ ގެއެއް ނީލަމުގައި ވިއްކާލަން ބޭންކް އޮފް މޯލްޑިވްސް (ބީއެމްއެލް) އިން އިއުލާންކޮށްފިއެވެ.
ބީއެމްއެލް އިން ކުރި އިއުލާނުގައިވާގޮތުން ވިއްކާލަން އިއުލާން ކޮށްފައިވަނީ، "ވެލި" ނަމަކަށް ކިޔާ ބަންޑާރަ ގޯއްޗާއި އެ ގޯތީގައިވާ އެންމެހާ އިމާރާތްތަކެވެ. މި ގޯއްޗަކީ 2،000 އަކަފޫޓުގެ ގޯއްޗެކެވެ.
ނީލަން ފެށޭ އަގަކީ 920،500 (ނުވަލައްކަ ވިހިހާސް ފަސްސަތޭކަ) ރުފިޔާ ކަމަށާ، ނީލަން ހުށަހެޅުމުގެ އެންމެ ފަހު ތާރީހަކީ މި މަހުގެ 10 ވަނަ ދުވަހުގެ 12:00 ކަމަށް އިއުލާނުގައިވެއެވެ.
ބީއެމްއެލް އިން އިތުރަށް ބުނިގޮތުގައި، މުއްދަތު ހަމަވާ ތާރީހާ ހަމައަށް ނީލަމަށް ހުށަހަޅާ ފަރާތްތަކުގެ ތެރެއިން އެވަގުތު އެތަނަށް ހާޒިރުވެ ތިބޭ ފަރާތްތަކުގެ ހާޒިރުގައި ސިޓީތައް ކަނޑައި އެންމެ މަތީ އަގު އިއުލާން ކުރެވޭނެއެވެ.
އަދި ކޮންމެ ދުވަހެއްގެ އެންމެ މަތީ އަގު ބޭންކުގެ ވެބްސައިޓުން ފެންނަން ހުންނާނެ ކަމަށް އެ ބޭންކް އިން ބުނެފައި ވެއެވެ.
އަދި ނީލަން ނިންމާލެވޭނީ އެންމެ މަތީ އަގު ކަމަށް އިއުލާން ކުރެވޭ އަގަށް ބަދަލެއް ނައިސް، އިއުލާންކުރެވޭ ތާރީހުން ފެށިގެން ޖެހިޖެހިގެން 05 ފަސް ދުވަސް ވަންދެން (ސަރުކާރު ބަންދުދުވަސްތައް ނުހިމަނާ) އެއް އަގެއްގައި އޮތުމުން ކަމަށްވެސް އިއުލާނުގައި ވެއެވެ.
ނީލަމާ ގުޅޭ އިތުރު މައުލޫމާތު، އެ ބޭންކްގެ ވެބްސައިޓުން ލިބޭނެއެވެ.
Advertisement
This content is created and paid for by advertisers and does not involve Voice Journalists
