އިނގިރޭސިވިލާތުން ދިވެހިރާއްޖެއަށް ކަނޑައަޅުއްވާފައިވާ އާ ސަފީރު ނިކޮލަސް ޑޭވިޑް ލޯ ދިވެހިންނާ ދިވެހި ބަހުން ތައާރަފުވެ، އާއްމުކުރި ވީޑިއޯ އަކަށް ގިނަ ބައެއްގެ ސަމާލުކަން ލިބިއްޖެއެވެ.
ނިކޮލަސް އޭނާގެ ސަފީރު ކަމުގެ ލިޔުން ރައީސް މުހައްމަދު މުއިއްޒުއާ އިއްޔެ ހަވާލުކުރެއްވުމަށް ފަހު، އިނގިރޭސި އެމްބަސީގެ ރަސްމީ 'އެކްސް' އެކައުންޓް މެދުވެރިކޮށް ދެއްވި ވީޑިއޯ މެސެޖެއް ފައްޓަވަމުން ދިވެހި ބަހުން ވަނީ ވާހަކަ ދައްކަވާފައެވެ.
"އައްސަލާމް އަލައިކުމް. އަޅުގަނޑުގެ ނަމަކީ ނިކް ލޯ. އަޅުގަނޑަކީ އިނގިރޭސި ސަފީރު. އެންމެންގެ ހާލު ކިހިނެއްތޯ؟،" އައު ސަފީރު ވިދާޅުވިއެވެ.
މިއާއެކު އިނގިރޭސި ބަހުން ވާހަކަ ކުރިއަށް ގެންދަވަމުން އޭނާ ވިދާޅުވީ، ސަފީރުކަމުގައި އޭނާ ހުންނަވާ ހަތަރު ވަރަކަށް އަހަރު، ރާއްޖޭގެ ކޮންމެ ތަނެއްގައި ދިރިއުޅޭ ރައްޔިތަކާ ވެސް ބައްދަލުކުރެވޭނެ ކަމަށް އުންމީދުކުރައްވާ ކަމަށެވެ.
އަދި މިއަދު ދުނިޔެ މި އޮތީ ވަރަށް ގިނަ މައްސަލަތަކެއްގެ ތެރޭގައި ކަމަށާއި، އެހެންނަމަވެސް ދެ ގައުމު ގުޅިގެން ދެ ގައުމުގެ މަންފާއަށާއި، ކުރިއެރުމަށް، އަދި ތިމާވެށީގެ ދާއިރާއިން ހުރި ގޮންޖެހުންތައް ހައްލު ކުރުމަށް މަސައްކަތް ކުރެވޭނެ ކަމަށް ވިދާޅުވިއެވެ.
ނިކޮލަސް އިތުރަށް ވިދާޅުވި ގޮތުގައި، އޭނާ މަސައްކަތް ކުރައްވާނީ "ހަމައެކަނި މާލެއަށް ކަނޑައަޅާފައި ހުންނަ ސަފީރު"ގެ ގޮތުގައެއް ނޫން ކަމަށާ އެހެނެއް ކަމަކު ރާއްޖޭގައި އޭނާ އިނގިރޭސިވިލާތް ތަމްސީލް ކުރައްވާނީ "މުޅި ރާއްޖެއަށް ކަނޑައަޅާފައި ހުންނަ ސަފީރު"ގެ ގޮތުގައެވެ.
ރާއްޖެ ވަޑައިގަތުމުގެ ކުރިން އާ ސަފީރު ނިކް ލޯ ވަނީ ބަންގުލަދޭޝްގައި ހުންނަވާ އިނގިރޭސި ސަފީރުގެ ނައިބުކަން ކުރައްވައިފަ އެވެ. އަދި އިންޑިއާ އާއި ޗައިނާގައި ހުންނަ އިނގިރޭސި އެމްބަސީގެ އިސް މަގާމުތައް ވެސް އޭނާ ފުރުއްވި އެވެ.
Advertisement
This content is created and paid for by advertisers and does not involve Voice Journalists
