ރޯދަމަހަށް ހާއްސަކޮށް އެސްޓިއޯއިން ގެންނަ ކާބޯތަކެތީގެ ފުރަތަމަ ޝިޕްމަންޓް މިހިނގާ ފެބުރުއަރީމަހުގެ ފުރަތަމަކޮޅު ބާޒާރަށް ނެރޭނޭކަމަށް އެކުންފުނިން ބުނެފިއެވެ.

ރޯދަމަހު ބާޒާރުގައި ކާބޯތަކެތީގެ އަގުތައް އުފުލުނަ ނުދިނުމަށް އެސްޓީއޯއިން ކުރަމުންގެންދާ މަސައްކަތްތަކާ ގުޅޭ މައުލޫމާތު ހިއްސާކުރަމުން އެކުންފުނިން ބުނީ، ކޮންމެ އަހަރެއްގެ ރޯދަމަހަށްވެސް އަސާސީ ކާބޯތަކެތި ފޯރުކޮށްދިނުމަށް އިކޮނޮމިކް މިނިސްޓްރީއާ ގުޅިގެން ހާއްސަ ތައްޔާރީތަކެއް ވަމުން އަންނަ ކަމަށާއި، މިގޮތުން މިފަހަރުގެ ރޯދަމަހުވެސް އާއްމުކޮށް ބޭނުންކުރާ ތަކެތީގެ އަގުތައް އުފުލުނަ ނުދިނުމަށް ފިޔަވަޅުތައް އަޅަން ފަށާފައިވާކަމަށެވެ. ކުރީ އަހަރުތަކުގެ ތަޖުރިބާއާއެކު، މިއަހަރު ވަކިން ހާއްސަކޮށް ރައްޔިތުންނަށާއި ވިޔަފާރިތަކަށް ލުއިވާނެހެން ކަންކަން ރޭވިފާކަން ފާހަގަކުރަމުން އެސްޓީއޯއިން ބުނީ،  ބާޒާރުގެ އަގުތައް ދުވަހުން ދުވަހަށް މޮނިޓަރކޮށް، އަގު މައްޗަށް ދާ ބާވަތްތައް ދެނެގަނެ، އަވަސް ފިޔަވަޅުތައް އަޅަމުންދާނޭ ކަމަށެވެ.

އެސްޓީއޯއިން ބުނީ ރާއްޖޭގެ ބާޒާރަށް ބޭނުންވާ މިންވަރަށް މުދާ އިމްޕޯޓްކޮށް، ރާއްޖޭގެ އެކި ކަންކޮޅުތަކަށް ފޯރުކޮށްދިނުމުގެ އިންތިޒާމްތައްވެސް ހަމަޖައްސަމުންދާކަމަށެވެ. ރޯދަމަހުގެ ތެރޭގައި ތަކެތީގެ އަގުތައް މައްޗަށް ދިއުން ހުއްޓުވުމަށްޓަކައި، އާންމު ދިރިއުޅުމަށް ބޭނުންވާ މައިގަނޑު ކާބޯތަކެތީގެ އޯޑަރުތައް ދުރާލާ ވަނީ ކުރެވިފައިވާ ކަމަށާއި، މިގޮތުން ފުރަތަމަ ޝިޕްމެންޓް ފެބުރުއަރީ މަހުގެ ކުރީކޮޅު މާކެޓަށް ނެރެވޭނޭކަމަށް އެސްޓީއޯއިން ބުންޏެވެ. އަދި އިތުރު ޝިޕްމަންޓުތައް ހަމަޖެހިފައިވާ އުސޫލުން ގެންނަމުންދާނޭކަމަށްވެސް އެސްޓިއޯއިން ބުންޏެވެ.

އެސްޓީއޯއިން ވަނީ ރައްޔިތުންނަށް ކޮންމެހެން ބޭނުންވާ އަސާސީ ތަކެތީގެ އިތުރުން އެހެނިހެން މުހިންމު ކާބޯތަކެތި ވެސް ބާޒާރަށް ނެރުމަށް ނިންމާފައެވެ. އެގޮތުން މިކަމުގައި ޚާއްޞަކޮށް ބާޒާރުގައި އަގު މައްޗަށް ދާކަމަށް ފާހަގަކުރެވޭ ތަކެއްޗަށް އިސްކަންދޭނޭކަމަށް އެސްޓީއޯއިން ބުނެއެވެ. 

- އަސާސީ ކާބޯތަކެތި:  ފިޔާ، ބިސް އަލުވި، ކާށި، ކަދުރު

- ތަރުކާރީ އަދި މޭވާ: ލުނުމެދު، އިނގުރު، ލައިމް، ކެރެޓް، އޮރެންޖް، ކެބެޖް، މިރުސް، ފޭރު، ކަރާ، އަނބޫ، ޕެޝަންފުރުޓް، ކިއުކަންބާ

- ޕްރޮސެސްޑް ކާނާ : ނެސްލޭ ކުރީމް، ކޮކޯ ޕައުޑަރ، ބޭކެޓް ބީންސް، ގެރިކިރު ދަޅު

- ކެއްކުމަށް ބޭނުންކުރާތަކެތި:  ސަންފްލާވަރ އޮއިލް، ވެޖިޓަބަލް އޮއިލް، ބާސްމަތި ހަނޑޫ

ރައްޔިތުންގެ ޒަރޫރީ ބޭނުންތަކަށް ބޭނުންވާ މުދާ ފަސޭހައިން ލިބޭނެ އިންތިޒާމް ހަމަޖައްސައިދިނުމަކީ އެސްޓީއޯގެ މައިގަނޑު އެއް މަޤްސަދުތަކުގެ ތެރޭގައި ހިމެނޭ އެއް ކަމެވެ. އަދި އެތަކެތި އެކަށީގެންވާ އަގެއްގައި ރާއްޖޭގެ ހުރިހާ ކަންކޮޅުތަކަކުން ލިބޭނެ މަގު ފަހި ކޮށްދިނުމަކީވެސް އެސްޓީއޯގެ މަޤްސަދުތަކުގެ ތެރޭގައި ހިމެނޭ ކަންތަކެވެ.