ގއ. ވިލިނގިލި ހޮސްޕިޓަލުގައި ރޭ ވިހެއުމަށްފަހު މަންމަ ނިޔާވިތާ މާ ގިނައިރު ނުވަނީސް ދަރިފުޅު ނިޔާވުމުގެ ހާދިސާ މެދުވެރިވީ ހޮސްޕިޓަލުގެ އިހުމާލުންތޯ ބަލަމުންދާ ކަމަށް ހެލްތު މިނިސްޓްރީ އިން ބުނެފިއެވެ. 

ހެލްތު މިިނިސްޓްރީގެ މީޑިއާ އޮފިޝަލަކު "ވޮއިސް" އަށް ކަށަވަރުކޮށްދިން ގޮތުގައި މި މައްސަލަ މިނިސްްޓްރީ އިން ބަލަން ފަށާފައި ވެއެވެ. ނަމަވެސް  މި މައްސަލައިގެ އިތުރު ތަފްސީލެއް ހާމަކޮށްފައި  ނުވެެއެވެ.

"ވޮއިސް" އަށް މައުލޫމާތު ދެމުން ގއ. ވިލިނގިލީގެ ރައްޔިތަކު ބުނީ ނިޔާވި އަންހެންމީހާގެ ދެ ދަރިން ތިބޭ ކަމަށެވެ. ރޭ ނިޔާވެފައި އޭނާގެ ތިން ވަނަ ދަރިފުޅެވެ.  އޭނާ ބުނީ ހޮސްޕިޓަލަށް ފަރުވާ ހޯދަން ދިޔަ މާބަނޑު އަންހެންމީހާއާއި އޭނާގެ ބަނޑުގައި އޮތް ދަރިފުޅު ނިޔާވާން މެދުވެރިވީ އެއާ އެމްބިއުލާންސްއަށް އެރުމުގެ ތެރެއިން އޮކްސިޖަން މަދުވުމާއި ގުޅިގެންނެވެ. 
ބަނޑަށް 8 މަސް ފުރުނު އެ ބަލިމީހާ އިއްޔެ ހަވީރު ސިޒޭރިއަން ހެދުމަށްފަހު ހޭނާރައިގެން ދަރިފުޅާއި ދެމީހުން ވެންޓިލޭޓަރަށް ލާފައިވާ ކަމަށް މައުލޫމާތު ލިބިފައި ވެއެވެ. ސިޒޭރިއަން ހެދި ވަގުތުވެސް ބަލިމީހާ ހުރީ ވަރަށް ބޮޑަށް އަރިދަފުސް ރޯގާ ޖެހިފައި ކަމަށްވެސް މައުލޫމާތު ލިބިފައި ވެއެެވެ. އިތުރު ފަރުވާއަށް އެދެމައިން މާލެ ގެންދިއުމަށް ލަސްވުމުން ރަށުގެ ބައެއް ރައްޔިތުން ހޮސްޕިޓަލް ކުރިމަތީގައި އަޑުގަދަކޮށް ނުރުހުންވުން ފާޅުކޮށްފައި ވެއެވެ. 

Advertisement

މައުލޫމާތު ލިބޭގޮތުގައި ގއ . އަތޮޅު ހޮސްޕިޓަލުން މާބަނޑު މީހާއަށް ފަރުވާ ނުލިބި ގިނަ އިރުތަކެއްވެ އެއަރ އެމްބިއުލަންސްގައި މަންމައާއި ދަރިފުޅަށް ބޭނުންވާ ވަރަށް އޮކްސިޖަން ނެތުމުން ބަލިމީހާ ގޮވައިގެން ނުފުރި ލަސްވެފައި ވެއެވެ. 

އާސަންދަ ނިޒާމްގެ ތެރެއިން ފަރުވާ ލަސްވުމާއި ހޮސްޕިޓަލުން ބަލިމީހުންނަށް އިހުމާލުވުމުގެ މައްސަލަތައް މީގެ ކުރިންވެސް ވިލިނގިލި ހޮސްޕިޓަލުގައި ދިމާވެފައިވާ ކަމަށް ވިލިނގިލީގެ ރައްޔިތުން ކަންބޮޑުވުން ފާޅުކޮށްފައި ވެއެވެ.