އައި.ޖީ.އެމް ހޮސްޕިޓަލްގެ އިމަޖެންސީ ރޫމްގައި ފަރުވާދެމުން ދިޔަ ނުކުޅެދުންތެރިކަން ހުންނަ މީހަކު ނިޔާވި މައްސަލަ ފުލުހުން ބަލަން ފަށައިފިއެވެ.

ފުލުހުން ބުނި ގޮތުގައި އެ މައްސަލަ 2025 ފެބްރުއަރީ 06 ވަނަ ދުވަހުގެ 23:30 އެހައިކަންހާއިރު ފުލުހުންނަށް ރިޕޯޓް ކޮށްފައިވާއެވެ.

އަދި އެ މީހާ އައި.ޖީ.އެމް ހޮސްޕިޓަލަށް ފަރުވާދިނުމަށް ގެންގޮސްފައިވަނީ ތަނަކުން ވެއްޓި ލިބުނު އަނިޔާއަކާ ގުޅިގެން ކަމަށް ބައެއް ފަރާތްތަކުން ބުނި ނަމަވެސް އެފަދަ ކަމެއް ނުވާކަމަށް ފުލުހުން ބުންޏެވެ.

Advertisement

އަދި ފުލުހުން ބެލި ބެލުމުން، ހަށިގަނޑުގައި ފަރުވާ ދިނުމުގެ ތެރޭގައި ހުރި ނިޝާނެއް ފިޔަވައި ހަށިގަނޑަށް ގެއްލުމެއް ލިބިފައި ހުރި ކަމުގެ ނިޝާނެއް ފެންނަން ނެތް ކަމަށާ ޢާއިލާގެ ފަރާތުން ވެސް މިހާތަނަށް، ތުހުމަތު ތަކެއްކޮށް އެފަދަ ޝަކުވާއެއް ފުލުހުންނާ ހިއްސާ ކޮށްފައި ނުވާ ކަމަށް ފުލުހުން މައުލޫމާތު ދެއެވެ. 

”އެ މީހާއަށް ފަރުވާދިނުމަށް މަސައްކަތް ކުރަމުން ދަނިކޮށް ކުއްލިޔަކަށް ތެދުވެގެން ދުއްވައިގަނެގެން ދަނިކޮށް ވެއްޓުނުކަމުގެ މަޢުލޫމާތު ހޮސްޕިޓަލުން ދީފައިވެއެވެ.“ ފުލުހުން ބުންޏެވެ. 

ފުލުހުން އިތުރަށް ބުނީ، އެ މީހާގެ ހަށިގަނޑުން ފުލުހުން ސާމްޕަލް ނަގާފައިވަނީ އެފަދަ މައްސަލައެއް ހުށަހެޅުމުން އާންމުކޮށް ޢަމަލުކުރާ އުސޫލުން ކަމަށާ، މި މައްސަލައާ ގުޅޭ ގޮތުން އިތުރަށް ބަލަންޖެހޭ ކަންކަން ފުލުހުން ބަލަމުންދާ ކަމަށެވެ.