ރ.އަތޮޅު މީދޫގައި ފުލުހަކަށް ކުޑަކުއްޖަކު ހަމަލާ ދިން މައްސަލައެއް ފެންމަތިވެއްޖެއެވެ.

ފުލުހުން މީޑިއާތަކާ ހިއްސާކުރި މެސެޖެއްގައި ބުނީ، މީދޫ މަގުމަތީގައި އަޑުގަދަކޮށް ހަޅޭއްލަވަމުންދިޔަ ކުދި ބަޔަކަށް އެގޮތަށް ކަންތައް ނުކުރުމަށް އޮފް ޑިއުޓީގައި ހުރި ފުލުހަކު ނަސޭހަތްތެރިވުމުން، އެކަން ނުހުއްޓާނެކަމަށް ބުނެ އެ ކުދިން ޖަދަލުކޮށް، އޮފިސަރާ މުއާމަލާތްކުރުމަށް ދެކޮޅު ހެދިކަމަށެވެ.

އެހެންވެ، ޕޮލިސް ސްޓޭޝަނަށް ހާޒިރުވުމަށް އެދުމުން ހަމަނުޖެހުން ހިންގައި ޕޮލިސް އޮފިސަރަށް ހަމަލާ ދިން ކަމަށް ފުލުހުން ބުންޏެވެ.

"މި މައްސަލަ ފުލުހުން ގެންދަނީ ތަހުގީގު ކުރަމުން. އަދި ކުއްޖާއަށް ފުލުސް އޮފިސަރު އަނިޔާކޮށްފައިވާ ކަމަށް އާއިލާއިން ތުހުމަތު ކުރާތީ އެ މައްސަލަ ވެސް ފުލުހުން ދަނީ ބަލަމުން،" އެ މުއައްސަސާއިން ބުންޏެވެ.

އޭގެ އިތުރުން އެ ހާދިސާގައި ހަމަލާދިން ކުއްޖާ ކޮންޓްރޯލް ކުރުމުގައި އަމަލުކޮށްފައިވާ ގޮތުގެ ރިވިއުއެއް، ފުލުހުންގެ ޕްރޮފެޝަނަލް ސްޓޭންޑާޑްސް ކޮމާންޑުން ކުރިއަށްގެންދާކަމަށް ފުލުހުން  ބުނެފައި ވެެއެވެ. ބުރާސްފަތި ދުވަހު ހިނގި މި ހާދިސާގެ ވީޑިއޯއެއް ސޯޝަލް މީޑިއާގައި މިހާރު ދަނީ ދައުރުވަމުންނެވެ. ވީޑިއޯ އިން ފެންނަނީ ކުލަ ހެދުމުގައި ހުރި ފިރިހެނެއް ކުޑަކުއްޖަކު ހިފަހައްޓައިގެން ގެންދާ މަންޒަރެވެ. 

އެ ވީޑިއޯއިން ފުރަތަމަ ފެންނަނީ، ކުޑަކުއްޖާ މަގުމަތިން ގެންދަނިކޮށް، އެ ކުއްޖާ ގަދަހަދައި ފުލުސް މީހާ ބިންމައްޗަށް ވައްޓާލާ މަންޒަަރެވެ. އެހާ ހިސާބުން ފުލުސް މީހާ ތެދުވެ، އެ ކުއްޖާ ހިފަހައްޓަން މަސައްކަތްކުރާތަން ފެނެއެވެ.