ސަރުކާރުން ރާވައިގެން ސްޕްރީމްކޯޓުގެ 3 ފަނޑިޔާރަކު ވަކިކުރަން އުޅޭކަމަށް އިދިކޮޅު އެމްޑީޕީން ތުހުމަތުކޮށްފިއެވެ.

ސްޕްރީމް ކޯޓަށް ސަރުކާރުން ނުފޫޒު ފޯރުވުމަށް މަސައްކަތްކުރަމުންދާކަމަށް ބުނެ، އެމްޑީޕީން ނެރުނު ބަޔާނެއްގައި ބުނީ ސްޕްރީމް ކޯޓުގެ އެކި ނިންމުންތަކަށް ނުފޫޒު ފޯރުވުމަށްޓަކައި އެ ކޯޓުގެ ބައެއް ފަނޑިޔާރުން މަޤާމުން ވަކިކުރުމަށާއި، އެހެނިހެން ގޮތްގޮތުން ނުފޫޒު ފޯރުވުމަށް ސަރުކާރުން މަސައްކަތްކުރަމުންދާ ކަމަށެވެ.

އެމްޑީޕީން ބުނީ ސަރުކާރުން ކޯޓުތަކަށް ނުފޫޒު ފޯރުވަން އުޅެނީ ސިޔާސީޕާޓީތަކުން ބޭނުންވުމުން ރައްޔިތުންގެ މަޖިލީހުގައި މެމްބަރުންގެ މަޤާމު ގެއްލުވާލެވޭގޮތަށް ޤާނޫނު އަސާސިއަށް ގެނައި އިސްލާހް ބާތިލްކުރުމަށް ކަނޑައެޅުމަށް ކޯޓަށް ވައްދާފައި އޮތް މައްސަލައަށް ނުފޫޒު ފޯރުވުމަށްކަމަށެވެ. އެ މައްސަލަ ސްޕްރީމް ކޯޓަށް ހުށަހެޅުއްވީ، ކެންދޫ ދައިރާގެ ކުރީގެ މެމްބަރު އަލްއުސްތާޛު އަލީ ހުސައިން އެވެ.

Advertisement

އެމްޑީޕީން ބުނީ ސްޕްރީމް ކޯޓުގެ 3 ފަނޑިޔާރަކު މަޤާމުން ވަކިކުރުމަށް ސަރުކާރުން ރާވަމުންދާއިރު، ހުސްވާ މަޤާމުތަކަށް މިހާރުގެ ޕީޖީ، އައްބާސް ޝަރީފްގެ އިތުރުން ސަރުކާރުގެ ސިޔާސީ މަޤާމުތައް ފުރުއްވަމުން ގެންދަވާ ދެ ބޭފުޅަކު އައްޔަނުކުރުމަށް މަސައްކަތްކުރަމުންދާކަމަށެވެ. އެމްޑީޕީން ބުނީ ސްޕްރީމް ކޯޓަކީ ނުފޫޒުން އެއްކިބާވެފައި އޮތް ކޯޓަކަށް ހެދުމަކީ އެމްޑީޕީ ސަރުކާރުގައި ހޯދުނު އެންމެބޮޑު ކާމިޔާބުކަމަށެވެ.

އެމްޑީޕީން ބުނީ ސްޕްރީމްކޯޓުގެ ފަނޑިޔާރުން ބަދަލުކުރުމަށް ސަރުކާރުން ފަށާފައިވާ މަސައްކަތަކީ އަދުލުވެރި އަދި ރައްޔިތުންގެ އިތުބާރުއޮތް ޖުޑިޝަރީއެއް ހޯދުމަށް ފަހަތަށް އެޅޭ ފިޔަވަޅެއް ކަމަށާއި ސްޕްރީމް ކޯޓުގެ ބައެއް ފަނޑިޔާރުން ބަދަލުކުރުމަށް ސަރުކާރުން ފަށާފައިވާ މަސައްކަތްތައް ހުއްޓާލުމަށް ގޮވާލާކަމަށެވެ. އެމްޑީޕީން ބުނީ ސަރުކާރުން ކުރާ މިފަދަ ނެއްގާނީ ކަންކަމާ ދެކޮޅަށް އެޕާޓީން އަބަދުވެސްަ ތެދުވާނޭ ކަމަށެވެ.