މިއަދު ބޭއްވުނު ބައި އިލެކްޝަން ނަތީޖާއިން ސާފުވެގެންދިޔައީ، ސަރުކާރުން ބިރު ދެއްކި ނަމަވެސް ބިރު ފަހަނައަޅައި ރައްޔިތުން ނުކުންނާނެކަން ކަމަށް އިދިކޮޅު އެންމެބޮޑު ޕާޓީ، އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެއެވެ.

މިއަދު ކުރިއަށްދިޔަ 12 ރަށެއްގެ ލޯކަލް ކައުންސިލްތަކުގެ ބައި-އިލެކްޝަން އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ބައި-އިލެކްޝަނުގެ އިންތިހާބު ޕީއެންސީން ވަނީ ގިނަ ގޮނޑިތައް ކާމިޔާބުކޮށްފައެވެ. އިންތިހާބާ ގުޅޭގޮތުން ފައްޔާޒް އެކްސްގައި ކުރެއްވި ޕޯސްޓެއްގައި ވިދާޅުވީ، މުޅި ސަރުކާރު ނުކުމެ ދައުލަތުގެ މުދަލާއި ބާރުގެ ބޭނުންކޮށް ބަހަމުންދިޔަ ފައިސާ އާއި ވަޒީފާތަކުގެ ކުރިމަތީގައި އެމްޑީޕީގެ މެމްބަރުން މިއަދު ހޯދީ ބޮޑު ކާމިޔާބީއެއް ކަމަށެވެ.

ފައްޔާޒް ވިދާޅުވީ ކުރިއަށް އޮތް އިންތިހާބުތަކަށް އެމްޑީޕީން ނުކުންނާނީ މިއަދުގެ ނަތީޖާތަކުން ހިތްވަރު ހޯދައިގެން ކަމަށެވެ. ފައްޔާޒް ވަނީ މި އިންތިހާބުތަކުގައި އެމްޑީޕީއަށް މަސައްކަތް ކޮށްދެއްވައި ވޯޓު ދެއްވި އެންމެހާ ބޭފުޅުންނަށް ޝުކުރު އަދާކުރައްވާފައެވެ. 

ބައި އިލެކްޝަނުގެ ވަގުތީ ނަތީޖާތައް ދައްކާގޮތުން 13 ގޮނޑީގެ ތެރެއިން ޕީއެންސީން ވަނީ 9 ގޮނޑި ނަގާފައެވެ. އިންތިހާބުގައި އިދިކޮޅު މައި ޕާޓީ، އެމްޑީޕީއަށް 2 ގޮނޑި ލިބުނުއިރު، އަމިއްލަގޮތުން ވާދަކުރި ދެ ކަނޑިޑޭޓަކުވެސް އިންތިހާބު ކާމިޔާބުކޮށްފައެވެ. މިއަދު ބޭއްވި ބައި އިެލކްޝަނުގައި އެމްޑީޕީން ކާމިޔާބުކުރީ އދ.ހަންޏާމީދުއާއި ނ.މިލަދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ގޮނޑިތަކެވެ.

މިއީ ޤާނޫނަށް ގެނައި އިސްލާހަށްފަހު ބައި އިލެކްޝަނެއް ކުރިއަށްދިޔަ ފުރަތަމަ ފަހަރެވެ. ޤާނޫނަށް ގެނައި އައު އިސްލާހުގައިވާގޮތުން މިހާރު ބައި އިލެކްޝަން ބޭއްވޭނީ އަހަރަކު ދެފަހަރުއެވެ.