މިއަދު ހެނދުނު ރޯވި އިމާރާތް ކަމުގައިވާ މ. ހައުސް ޕްލާޒާ ތަޅާލަން ސަރުކާރުން ނިންމާފައިވާ ކަމަށް ހޯމް މިނިސްޓަރ ޢަލީ އިޙްސާން ވިދާޅުވެއްޖެއެވެ.

"ވޮއިސް" އިން ކުރި ސުވާލަކަށް ޖަވާބު ދެއްވަމުން މިނިސްޓަރ ވިދާޅުވީ މ. ހައުސް ޕްލާޒާ އެއީ ސަރުކާރުން ތަޅާލަން ނިންމާފައިވާ އިމާރާތެއް ކަމަށެވެ. ނަމަވެސް އެތަން ތަޅާލުމަށް ދާނެ ހަރަދު ބޮޑުކަމުން ސަރުކާރަށް އެމަސައްކަތް ކުރަން ދަތިވިކަން މިނިސްޓަރ ފާހަގަކުރެއްވިއެވެ.

އެހެން ނަމަވެސް އަމިއްލަ ފަރާތަކާއިއެކު މިކަން ކުރުމަށް ސަރުކާރުން މަސައްކަތް ކުރަމުންދާ ކަމަށް މިނިސްޓަރ ހާމަކުރެއްވިއެވެ. 

Advertisement

މިިނިިސްޓަރ މިފަދައިން ވިދާޅުވެފައިވާއިރު މ. ހައުސް ޕްލާޒާއަކީ ޑްރަގް އައްޑާއެއްގެ ގޮތުގައި ބެލެވޭ ތަނެއްގެ ގޮތުގައި ބައެއް އާންމުން ސިފަކުރަމުންދެއެވެ. އެތަނުގައި މީގެ ކުރިންވެސް އަލިފާނުގެ ހާދިސާއެއް ހިނގާފައިވާއިރު އެތަނަކީ ފަޅު ތަނެއްވެސްމެއެވެ.

މި ސަރުކާރުން ވެރިކަމާއި ހަވާލުވިފަހުން ވަނީ ގޭންގްތަކުން މާލޭގެ ފަޅު އަދި ވީރާނާ ތަންތަނުގެ ތެރޭގައި ޑްރަގް ވިޔަފާރި ފަދަ ކުށްތައް ހިންގަމުންދާކަން ފާހަގަކޮށްފައެވެ. އެ ބިންތަކުގެ ވެރިފަރާތާއި މަޝްވަރާކޮށްގެން އެފަދަ ތަންތަން ތަޅާލުމުގެ މަސައްކަތް ސަރުކާރުން ފަށާފައިވެއެވެ. 

އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް މި ހާދިސާގެ މަޢުލޫމާތު މިއަދު ހެނދުނު 06:35 ހާއިރު ލިބުމާ އެކު ފަޔަރފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައެވެ.

މިގޮތުން ފަޔަރފައިޓަރުން ކުރި މަސައްކަތުން ރޯވެފައިހުރި އަލިފާން އެއްކޮށް ނިއްވާލާފައިވަނީ 07:47 ހާއިރު ކަމަށް އެމްއެންޑީއެފް އިން މައުލޫމާތު ދިނެވެ. 

ގިނަދުވަސް ތަކެެއްވަންދެން ފަޅުގެއެއްގެ ގޮތުގައި ހުންނަ މި ގޭގައި އަލިފާން ރޯވެފައިވަނީ އެ ގޭގައި ހުރި ކުނިތަކެއްގައި ކަމަށް އެމްއެންޑީއެފް އިން ބުންޏެވެ.

މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ.