މަސްވެރިކަމާއި، ކަނޑުތަކާ ބެހޭ ދިރާސާތައް ކުރެއްވުމުގައި ދައުލަތުގެ ކަމާ ބެހޭ އިދާރާތަކުގައި 40 އަހަރަށް ވުރެ ދިގު މުއްދަތަކަށް ޚިދުމަތް ކުރައްވައިފައިވާ، މުޙައްމަދު ޝަކީލް އަވަހާރަވުމަކީ، އެ ދާއިރާއިން ޤައުމަށް ލިބުނު ފޫނުބެއްދޭނެ އުނިކަމެއް ކަމުގައި ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.
ޝަކީލް ނިޔާވީ މިއަދުގެ ވަގުތެއްގައެވެ. ނިޔާވި އިރު ޢުމުރަކީ 64 އަހަރެވެ.
ޝަކީލް ނިޔާވުމާއި ގުޅިގެން އެކްސްގައި ކުރެއްވި ޕޯސްޓެއްގައި ރައީސް މުޢިއްޒު ވިދާޅުވީ، މަރްޙޫމް މުޙައްމަދު ޝަކީލަކީ، މަސައްކަތް ކުރެއްވުމުގައި ހީވާގި، ހިތްވަރުފުޅު ގަދަ ބޭފުޅެއް ކަމަށެވެ.
”މަރްޙޫމް މުޙައްމަދު ޝަކީލްގެ ޢާއިލާއަށް ކެތްތެރިކަން ދެއްވުން އެދި، ތަޢުޒިޔާ ދަންނަވަމެވެ. ސުވަރުގޭގެ ދާއިމީ ނިޢުމަތާއި ރަޙްމަތުގައި، މާތް الله މަރްޙޫމު ޝަކީލުގެ ފުރާނަ ލައްވާށިއެވެ. އާމީން.“ ރައީސްގެ ޕޯސްޓުގައި ވިދާޅުވިއެވެ.
އަވަހާރަވި އިރު، ހުންނެވީ މެރިން ރިސަރޗް އިންސްޓިޓިއުޓްގެ ޑެޕިއުޓީ ޑިރެކްޓަރ ޖެނެރަލްގެ މަޤާމުގައި ޤައުމީ ޚިދުމަތުގައެވެ.
ޝަކީލްގެ ކަށު ނަމާދު އޮތީ މިއަދު މެންދުރު ނަމާދަށް ފަހު އާސަހަރާ މިސްކިތުގަ އެވެ.
Advertisement
This content is created and paid for by advertisers and does not involve Voice Journalists
