ބާޒާރުގައި މިހާރު ލުނބޯގެ އަގު އުފުލެމުންދާތީވެ، ލުނބޯގެ އަގު އަތްފޯރާފަށަށް ގެނައުމުގެ ގޮތުން އެސްޓީއޯއިން ލުނބޯ ޝިޕްމަންޓެއް ގެނެސްފިއެވެ.

އެސްޓީއޯގެ މެނޭޖިންގ ޑިރެކްޓަރު ޝިމާދު އިބްރާހީމް ވިދާޅުވީ، ރޯދަމަހު ރައްޔިތުން އެންމެ އާއްމުކޮށް ބޭނުންކުރާ ކާބޯތަކެތީގެ ބާވަތްތައް ދަތިނުވެ ލިބޭނޭމަގު ފަހިކުރުމަށް އެސްޓީއޯއިން ދުރާލާ ތައްޔާރުވެފައިވާކަމަށެވެ. ޝިމާދު ވިދާޅުވީ ބާޒާރުގައި އަގު މައްޗަށް ދާ ބާވަތްތައް ދެނެގަނެ, ދުވަހުން ދުވަހަށް ބާޒާރުގެ އަގުތައް މޮނިޓަރ ކުރަމުންދާކަމަށެވެ. މިގޮތުން ލުނބޯގެ ޝިޕްމަންޓް މިހާރު ލިބިފައިވާކަމަށް ޝިމާދު ފާހަގަކުރެއްވިއެވެ.

މީގެ ދުވަސްކޮޅެއްކުރިން މާލޭ ބާޒާރުގައި ލުނބޯ ކިލޯއެއްގެ އަގު 25 ރުފިޔާގައި ހުރިނަމަވެސް ނިމިގެންދިޔަ ހަފްތާގައި ލުނބޯ ކިލޯއެއްގެ އަގު ވަނީ 75 ރުފިޔާއަށް ބޮޑުވެފައެވެ. ބައެއް ފިހާރަތަކުން ލުނބޯ ކިލޯއެއް މިހާރު ވިއްކަނީ 85 ރުފިޔާއަށެވެ. އެސްޓީއޯއިން ގެނައި ލުނބޯ ޝިޕްމަންޓް ބާޒާރަށް ނެރެ ވިއްކަން ފެށުމުން ލުނބޯގެ އަގު ތިރިވެގެންދާނޭކަމަށް އެކުންފުނިން ބުނެއެވެ.

މިދިޔަ ރޯދަމަހުވެސް ބާޒާރުގައި ލުނބޯގެ އަގު ބޮޑުވުމުން އެސްޓީއޯއިން ވަނީ، ލުނބޯ ގެނެސް އަގުހެޔޮކޮށް ވިއްކާފައެވެ.

ދިވެހިން އެންމެ އާއްމުކޮށް ބޭނުންކުރާ ކާބޯތަކެތީގެ ބާވަތްތަކުގެ ތެރެއިން އެންމެ އަވަހަށް އަގަށް ބަދަލު އަންނަ ތަކެތީގެ ތެރޭގައި ލުނބޯ ހިމެނެއެވެ. ލުނބޯގެ އަގަށް އެންމެފަހުން ބޮޑު ބަދަލެއް އައިސްފައިވަނީ މިދިޔަ އަހަރުގެ އޮގަސްޓްމަހުގެ ތެރޭގައެވެ. އެފަހަރު ލުނބޯ ކިލޯއެއްގެ އަގު ވަނީ 140 ރުފިޔާއަށް މައްޗަށްގޮސްފައެވެ.

އެސްޓީއޯއިން ވަނީ ރައްޔިތުންނަށް ކޮންމެހެން ބޭނުންވާ އަސާސީ ތަކެތީގެ އިތުރުން އެހެނިހެން މުހިންމު ކާބޯތަކެތި ވެސް ބާޒާރަށް ނެރުމަށް ނިންމާފައެވެ. އެގޮތުން މިކަމުގައި ޚާއްޞަކޮށް ބާޒާރުގައި އަގު މައްޗަށް ދާކަމަށް ފާހަގަކުރެވޭ ތަކެއްޗަށް އިސްކަންދޭނޭކަމަށް އެސްޓީއޯއިން ބުނެއެވެ. 

- އަސާސީ ކާބޯތަކެތި:  ފިޔާ، ބިސް އަލުވި، ކާށި، ކަދުރު

- ތަރުކާރީ އަދި މޭވާ: ލުނުމެދު، އިނގުރު، ލައިމް، ކެރެޓް، އޮރެންޖް، ކެބެޖް، މިރުސް، ފޭރު، ކަރާ، އަނބޫ، ޕެޝަންފުރުޓް، ކިއުކަންބާ

- ޕްރޮސެސްޑް ކާނާ : ނެސްލޭ ކުރީމް، ކޮކޯ ޕައުޑަރ، ބޭކެޓް ބީންސް، ގެރިކިރު ދަޅު

- ކެއްކުމަށް ބޭނުންކުރާތަކެތި:  ސަންފްލާވަރ އޮއިލް، ވެޖިޓަބަލް އޮއިލް، ބާސްމަތި ހަނޑޫ

ރައްޔިތުންގެ ޒަރޫރީ ބޭނުންތަކަށް ބޭނުންވާ މުދާ ފަސޭހައިން ލިބޭނެ އިންތިޒާމް ހަމަޖައްސައިދިނުމަކީ އެސްޓީއޯގެ މައިގަނޑު އެއް މަޤްސަދުތަކުގެ ތެރޭގައި ހިމެނޭ އެއް ކަމެވެ. އަދި އެތަކެތި އެކަށީގެންވާ އަގެއްގައި ރާއްޖޭގެ ހުރިހާ ކަންކޮޅުތަކަކުން ލިބޭނެ މަގު ފަހި ކޮށްދިނުމަކީވެސް އެސްޓީއޯގެ މަޤްސަދުތަކުގެ ތެރޭގައި ހިމެނޭ ކަންތަކެވެ.