ސްޓޭޖްމަތީގައި ނަށަން ހުރި އަންހެނަކަށް ހާޓް އެޓޭކެއް ޖެހި، މަރުވެގެން ވެއްޓޭ ވީޑިއޯއެއް ސޯޝަލް މީޑިއާގައި ދައުރުވާން ފަށައިފިއެވެ.

އެންޑީޓީވީ އިން ރިޕޯޓްކުރި ގޮތުގައި ހޮނިހިރު ދުވަހު މި ހާދިސާ ހިނގާފައިވަނީ، ކައިވެނި ޕާޓީއެއްގެ ތެރޭގައި ކުރިއަށްދިޔަ އުފާފާޅުކުރުމުގެ ހަރަކާތެއްގެ ތެރެއިންނެވެ. ނަށަން ހުއްޓައި މަރުވެގެން ވެއްޓުނު ކަމަށް ބެލެވޭ އެ މީހަކީ އާއިލާ މީހެއްގެ ކައިވެނި ހަފްލާއެއްގައި ބައިވެރިވާން އިންދޯރުން ވިދިޝާއަށް ދަތުރުކުރި އުމުރުން 23 އަހަރުގެ ޕަރިނިތާ ޖެއިން ކިޔާ މީހެކެވެ.

ޕަރިނިތާ މަރުވެފައިވަނީ 200 މީހުންގެ އޯޑިއެންސެއް ހާޒިރުވެގެން ތިބި ކައިވެނީގެ ރަސްމިއްޔާތެއްގައި ނަށަން ހުއްޓައެވެ. ޕަރިނިތާ ނަށާފައިވަނީ މަޝްހޫރު ހިންދީ ފިލްމު "މޭރޭ ޔާރްކީ ޝާދީ" ފިލްމުގެ  ލަވަ "ޝަރާރާ" އަށެވެ. އެ ލަވަ ފެށިތާ 30 ސިކުންތުގެ ތެރޭގައި ކުއްލިއަކަށް އޭނާ ވެއްޓޭ މަންޒަރު ސޯޝަލް މީޑިއާގައި ދައުރުވީ ވީޑިއޯއިން ފެނިގެންދިޔައެވެ.

އޭނާ ސްޓޭޖްމައްޗަށް ވެއްޓުމާއެކު އެތަނުގައި ހާޒިރުވެގެންތިބި  ބައެއް ޑޮކްޓަރުން ވަނީ ޕަރިނިތާއަށް ސީޕީއާރް ދޭން މަސައްކަތްކޮށްފައެވެ. ސީޕީއާރް ދިނުަމަށްފަހުވެސް ޕަރިނިތާއަށް ހޭވެރިކަން ނައުމުން އޭނާ ކައިރި ހޮސްޕިޓަލަކަށް ގެންދިއުމުން ހޮސްޕިޓަލުން ބުނެފައިވަނީ އެތަނަށް ގެނާއިރުވެސް އޭނާ މަރުވެފައިވާކަމަށެވެ.

ޕަރިނީތާގެ މަރާ ގުޅޭގޮތުން ހޮސްޕިޓަލުން ކުރި ޓެސްޓްތަކުގެ ނަތީޖާ ރިޕޯޓްތަކުން ދެއްކިގޮތުގައި އޭނާ މަރުވެފައިވަނީ ހާޓްއެޓޭކެއް ޖެހުމުގެ ސަބަބުން ކަމަށެވެ. މިކަމާ ގުޅޭގޮތުން ބައެއް މީޑިއާތަކުން ރިޕޯޓްކޮށްފައިވާ ގޮތުގައި ހިތުގެ ބަލިއަކީ ޕަރިނިތާގެ އާއިލާ ތެރޭގައި އޮންނަ ބަލިއެކެވެ.

އެގޮތުން މީގެ ކުރިން ޕަރިނިތާގެ ފިރިހެން ކޮއްކޮއެއްވެސް ވަނީ އުމުރުން 12 އަހަރުގައި ހާޓް އެޓޭކެއް ޖެހުމުގެ ސަބަބުން މަރުވެފައެވެ.