ރޯދަމަހު އުމްރާގެ އަޅުކަން އަދާކުރުމަށްދާ އުމްރާވެރިންނަށް ޑޮލަރު ލިމިޓް އިތުރުކުރުމަށް ނިންމަވައި އެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާން ކުރައްވައިފިއެވެ. 

ރައީސް މިކަން އިއުލާންކުރެއްވީ މިއަދު އެކްސްގައި ކުރެއްވި ޕޯސްޓެއްގައެވެ. 

މި ޕޯސްޓުގައި ރައީސް ވިދާޅުވީ 1446 ވަނަ އަހަރުގެ ރަމަޟާންމަހު ޢުމްރާއަށް ވަޑައިގަންނަވާ ފަރާތްތަކަށް ބޭންކްގެ ރަސްމީ ރޭޓުގައި ޑޮލަރު ހޯދުމުގައި ލުއި ފަސޭހަ ޙައްލެއް ހަމަޖައްސައިދިނުމަށް ނިންމާފައިވާކަމަށެވެ.

Advertisement

އެގޮތުން، ކޮންމެ ޢުމްރާވެރިއެއްގެ ބޭންކް އޮފް މޯލްޑިވްސް ޑެބިޓް ކާޑަށް، މިހާރު އޮންނަ ޑޮލަރުގެ ލިމިޓުގެ އިތުރުން 1500 ޑޮލަރުގެ ލިމިޓެއް ހަމަޖައްސަވައި ދެއްވުމަށް ބޭންކް އޮފް މޯލްޑިވްސް އަށް އަދި މަރުކަޒީ ބޭންކް އެމްއެމްއޭ އަށް ދަންނަވާފައިވާ ކަމަށް ރައީސް ވިދާޅުވިއެވެ. 

ޓޫރިޒަމް ވިޔަފާރިތަކުން ޑޮލަރު މާރުކުރުމުގެ ޤަވާއިދަށް އަމަލުކުރަމުންދާ މިންވަރުން، ރައްޔިތުންގެ ބޭނުންތަކަސް ބޭންކުން ދޫކުރާ ޑޮލަރު އިތުރުކުރަމުންދާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ވިދާޅުވެފައެވެ. 

ޑޮލަރުގެ މައްސަލަ ހައްލުކުރަން ސަރުކާރުން ބޭރުފައިސާ ގަނެ ވިއްކުމުގެ އުސޫލުތައް ހަރުދަނާކޮށްފައިވާއިރު، ފަތުރުވެރިންގެ ބޮލަކަށް ބޭންކަށް މާރުކުރަން ޖެހޭ ގޮތަށް އިސްލާހުކުރި ޤަވާއިދާއެކު، ޑޮލަރުގެ މައްސަލައަށް ބޮޑު ހައްލެއް ލިބެގެންދާނެ ކަމަށް ސަރުކާރުން ބުނެއެވެ.