ބޭރުފައިސާ ގަނެވިއްކުމުގެ ޤަވާއިދަށް ގެނައި ބަދަލާއެކު ހުސްވި ޖެނުއރަީމަހުގެ ނިޔަލަށް ޓޫރިޒަމް ސިނާއަތުން ބޭންކުތަކަށް 50 މިލިއަނަށްވުރެ ގިނަ ޑޮލަރު މާރުކޮށްފިކަމަށް މަރުކަޒީ ބޭންކުން ހާމަކޮށްފިއެވެ.

ބޭރުފައިސާ މާރުކުރުމުގެ ޤަވާއިދަށް ގެނައި އިސްލާހާއެކު މިދިޔަ އަހަރުގެ އޮކްޓޯބަރުމަހު ޓޫރިސްޓް ވިޔަފާރިތަކުން ފަތުރުވެރިން އައި އަދަދަށް ބަލައިގެން ބޭންކަށް ޑޮލަރު މާރުކުރުމުގެ އެންމެ ފަހު ތާރީހެއްގެ ގޮތުގައި ކަނޑައެޅިފައިވަނީ ހުސްވި ޖެނުއަރީމަހުގެ 28 ވަނަ ދުވަހެވެ. މޯލްޑިވްސް މަނިޓަރީޫ އޮތޯރިޓީ (އެމްއެމްއޭ) އިން ބުނީ، ސުންގަޑި ހަމަވިއިރު ޓޫރިޒަމް ވިޔަފާރިތަކުން ޖެނުއަރީމަހުގެ ތެރޭގައި ބޭންކުތަކަށް 50 މިލިއަނަށްވުރެ ގިނަ ޑޮލަރު މާރުކޮށްފައިވާކަމަށެވެ.

އެމްއެމްއޭއިން ބުނީ، މި މުއްދަތުގައި، ރާއްޖޭގެ ރިޒޯޓުތަކުގެ ތެރެއިން %90 ރިޒޯޓުތަކުން މި ގަވާއިދާ އެއްގޮތަށް ބޭންކިން ނިޒާމަށް ބޭރު ފައިސާ މާރުކޮށްފައިވާތީ، ފަތުރުވެރިކަމުގެ ސިނާއަތުން މިކަމަށް ލިބޭ އެއްބާރުލުން ފާހަގަކުރާ ކަމަށެވެ.

Advertisement

ބޭރުފައިސާ މާރުކުރުމުގެ ޤަވާއިދުގައި އޮންނަ ގޮތުން ރިސޯޓްތަކުން، އެ ތަނަށް މަހެއްގެ މައްޗަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު، ނުވަތަ އާމްދަނީގެ 20 އިންސައްތަ ޑޮލަރު މާކުރަން ޖެހެއެވެ. ގެސްޓްހައުސްތަކުން މާރުކުރަންޖެހެނީ ބޮލަކަށް 25 ޑޮލަރު، ނުވަތަ އެފަރާތަކަށް މަހެއްގެ މައްޗަށް ލިބޭ އާމްދަނީގެ 20 އިންސައްތަ ޑޮލަރެވެ.

ޑޮލަރުގެ ރިޒާވާ ގުޅޭގޮތުން އެމްއެމްއޭއިން ބުނީ، މިއަހަރުގެ ޖެނުއަރީމަސް ނިމުނުއިރު ރާއްޖޭގެ ރަސްމީ ރިޒާވް 708.1 މިލިއަން އެމެރިކާ ޑޮލަރަށް އިތުރުވެފައިވާކަމަށެވެ. މިއީ، 2024 ވަނަ އަހަރުގެ ޑިސެންބަރު މަހުގެ ނިޔަލަށް ރިޒާވްގައި ހުރި މިންވަރާ ބަލާއިރު 5 އިންސައްތަ އިތުރުވުމެކެވެ.