މަޝްހޫރު ވިޔަފާރިވެރިޔާ، އަދި އިޖުތިމާއީ ޙިދުމަތްތެރިޔާ ޤާސިމް އިބްރާޙީމްގެ ހަޔާތްޕުޅުގެ މައްޗަށް ލިޔެފައިވާ ބަޔޮގްރަފީފޮތް މިރޭ ނެރެފިއެވެ.

ޤާސިމްގެ ހަޔާތްޕުޅުގެ މައްޗަށް ބިނާކޮށް ލިޔެފައިވާ މިފޮތް ނެރެދެއްވީ، މިކަމަށްޓަކައި ބޭއްވި ޙާއްސަ ހަފްލާއެއްގައި ނިޝާން އިއްޒުންދީންގެ އިއްޒަތުގެ ވެރިޔާ އިލްޔާސް އިބްރާޙީމެވެ. މި ފޮތުގައި ޤާސިމް އިބްރާހީމްގެ ޙަޔާތުގެ ތަޖުރިބާއާއި ޢިބްރަތްތައް ހިމެނޭއިރު، 800 ސަފްހާގެ މި ފޮތުގައި ޤާސިމްގެ ހަޔާތްޕުޅުގައި ހިނގާދިޔަ ފާހަގަކޮށްލެވޭ މުހިއްމު ވާހަކަތައް ހިމެނެއެވެ.

މި ފޮތުގައި ޤާސިމް އުފަންވުމާއި، ތުއްޕުޅުއިރުގައި މަންމާފުޅު އަވަހާރަވުމާއި ގުޅިގެން ދެން ދިރިއުޅުއްވަން ޖެހުނުގޮތާއި މާލެ އައުމަށްފަހު ދިރިއުޅުމުގައި އަމިއްލަފައިމައްޗަށް ތެދުވުމަށް ކުރެއްވި ދަތުރުގައި ކުރިމަތިވެވަޑައިގެންނެވި ތަޖުރިބާތައް ގެނެސްދީފައި ވެއެވެ. މީގެ އިތުރުން މި ފޮތުގައި ޤާސިމް އަމިއްލަ ވިޔަފާރި ފެށުނުގޮތާއި، ވިޔަފާރީގެ ކާމިޔާބީއާއި، މުޖުތަމައުއަށް ކޮށްދެއްވަމުން ގެންދަވާ ހިދުމަތްތަކުގެ އިތުރުން ޤާސިމްގެ ސިޔާސީހަޔާތްޕުޅުގެ ވާހަކަތައްވެސް ވަނީ ގެނެސްދީފައެވެ. މި ފޮތުގެ މުޞައްނިފަކީ ކުޅަދާނަ ލިޔުންތެރިޔާ މުޙައްމަދު ޖަމީލެވެ.

ޤާސިމް ބޮޔޮގްރަފީގެ މުސައްނިފް ޖަމީލް

ބަޔޮގްރަފީއެއް ނެރުމަށް ނިންމި ސަބަބާ ބެހޭގޮތުން މިރޭގެ ހަފްލާގައި ވާހަކަދައްކަވަމުން ޤާސިމް ވިދާޅުވީ، އޭނާގެ ހަޔާތުގެ ނާމާ ފޮތެއްގެ ގޮތުގައި ނެރުމަށް ނިންމެވީ, މި ބަޔޮގްރަފީގެ ތެރެއިން އެއްޗެއް ދަސްވެ، ފޮތުން ރަނގަޅު އެއްޗެއް އެނގި އެއްޗެއް ދަސްވެ އެކަމެއް ކުރެވޭނޭމަގު ތަނަވަސްވެގެން ދިއުމަކީ މިކަންކުރުމުގެ މައިގަނޑު މަޤްސަދު ކަމަށެވެ.

ފޮތް ނެރުމުގެ ހަފްލާގައި ޤާސިމް ވާހަކަދައްކަވަނީ

ބަޔޮގްރަފީގެ އިލެކްޓްރޯނިކް ބުކް އަދި އޯޑިއޯ ބުކް ހިމެނޭ ވެބްސައިޓް އިފްތިތާހުކުރުމުގެ ތެރެއިން..

މިރޭގެ ހަފްލާގައި ޤާސިމްގެ ހަޔާތުގެ ނާމާގެ ފޮތުގެ އިތުރުން ބަޔޮގްރަފީގެ އިލެކްޓްރޯނިކް ބުކް އަދި އޯޑިއޯ ބުކް ހިމެނޭ ވެބްސައިޓް ވަނީ ލޯންޗްކޮށްފައެވެ. މި ހަފްލާގައި ޤާސިމްގެ ހަޔާތްޕުޅުގެ އެކިދުވަސްވަރުގެ ދައްކުވައިދޭ ފޮޓޯ މައުރަޒެއްވެސް ވަނީ އިފްތިތާހުކޮށްފައެވެ. 

ގާސިމްގެ ހަޔާތްޕުޅު ކުރު ގޮތަކަށް ދައްކައިދޭ ފޮޓޯ މައުރަޒު، މާދަމާ ހެނދުނު 9:00 އިން ރޭގަނޑު 10:30 އާ ހަމައަށް އާއްމުކޮށް ހުޅުވާލެވިފައި ހުންނާނޭކަމަށް ހަފްލާ އިންތިޒާމްކުރި ފަރާތުން ބުނެއެވެ. ފޮޓޯ މައުރަޒަށް ޒިޔާރަތްކުރައްވާ ފަރާތްތަކަށް ބައޯގްރަފީގެ ކޮޕީއެއް ހިލޭ ދޭ ގޮތަށްވެސް ވަނީ ހަމަޖެހިފައެވެ.

ގާސިމް އިބްރާހީމަކީ އެމަނިކުފާނުގެ ޒުވާން އުމުރުން ފެށިގެން، މެދުކެނޑުމެއްނެތި ދިވެހިރާއްޖޭގެ ތަރައްޤީއަށާއި، ވިޔަފާރިއަށާއި، އިޤްތިޞާދަށް އަގުހުރި ޚިދުމަތްތަކެއް ކުރައްވަމުން ގެންދަވާ ބޭފުޅެކެވެ. ޤާސިމްގެ ދަރުމަވެރި ޚިދުމަތްތަކަކީ، ރާއްޖޭގައި އަމިއްލަ ފަރުދަކު މިހާތަނަށް ފޯރުކޮށްދެމުންދާ އެންމެ ފުޅާ ދާއިރާގެ ދަރުމަވެރި ޚިދުމަތްތަކެވެ.

ވޭތުވެދިޔަ ފަންސާހަކަށް އަހަރު ދުވަހުގެ ތެރޭގައި ދިވެހިރާއްޖެއަށް އައިސްފައިވާ އަދި އަންނަމުންދާ ތަރައްޤީގައި ޤާސިމްގެ ހިއްސާ ފާހަގަކޮށްލެވޭ މިންވަރަށް ބޮޑެވެ. އެބޭފުޅާ ކުރައްވާފައިވާ ތަޖުރިބާތައް ގިނަގުނައެވެ. ބިނާކުރެއްވި ދިވެހި ތަޢުލީމީ ޖީލު ފުޅާވެގެންވެއެވެ. ދިވެހިރާއްޖޭގެ ޑިމޮކްރެޓިކް ޙަޔާތުގައި ގާސިމް އިބްރާހީމް ކުރައްވާފައިވާ މަސައްކަތްޕުޅުތަކަކީވެސް އާރާސްތު މަސައްކަތްޕުޅުތަކެކެވެ.