މަޖީދިއްޔާ ސްކޫލުގެ ޕްރިންސިޕަލްގެ މަގާމަށް އަހުމަދު މުޖާހިދު ހަމަޖައްސައިފި އެވެ.

މުޖާހިދު މި މަގާމަށް އައްޔަންކުރެއްވީ ކުރިން އެ މަގާމުގައި ހުންނެވި އޭރުގެ ޕްރިންސިޕަލް އައިޝަތު މުހައްމަދު ސޯލިހު ރިޓަޔާ ކުރުމާއި ގުޅިގެންނެވެ. މަޖީދިއްޔާ ސްކޫލަށް ޕްރިންސިޕަލަކު ހޯދުމަށް އިއުލާން ކުރީ މިދިޔަ މަހުއެވެ. 

ތައުލީމީ ދާއިރާއިން 16 އަހަރުގެ ތަޖުރިބާ ހާސިލް ކުރައްވާފައިވާ މުޖާހިދު މި މަގާމަށް ހޮވިފައި ވަނީ ވަޒީފާއަށް އެދި ހުށަހެޅި ފަރާތްތަކުގެ ތެރެއިންނެވެ. އޭނާ ވަނީ މިއަދުން ފެށިގެން ޑިއުޓީއަށް ރިޕޯޓް ކުރަން ފަށާފައެވެ.

Advertisement

 މުޖާހިދު މީގެ ކުރިން ހުންނެވީ ސެންޓަރ ފޯ ހަޔާ ސެކަންޑަރީ އެޑިއުކޭޝަން (ސީއެޗްއެސްއީ)ގެ ޑެޕިއުޓީ ޕްރިންސިޕަލްގެ މަގާމުގަ އެވެ. އޭގެ ކުރިން އޭނާ ވަނީ އިމާދުއްދީން ސްކޫލުގެ ޕްރިންސިޕަލް މަގާމުގައިވެސް ކުރު މުައްދަތެއް ހޭދަކުރައްވާފައެވެ. 

މުޖާހިދު އެންމެ ފުރަތަމަ މަސައްކަތް ކުރެއްވީ ދަރަންދޫ ސްކޫލުގައި ފިޒިކްސް ޓީޗަރެއްގެ ގޮތުގައި، ފަހުން ދައުލަތުގެ މީޑިއާ، ޓެލެވިޜަން މޯލްޑިވްސް (ޓީވީއެމް) ގައި ޕާޓްޓައިމް ޕްރެޒެންޓަރެއްގެ ގޮތުގައި އޭނާ އާންމުންގެ މެދުގައި މަޝްހޫރުކަން ހޯއްދަވާފައި ވެއެވެ. 

އޭނާ ވަނީ މެލޭޝިޔާގެ އޯޕަން ޔުނިވާސިޓީން ތައުލީމީ ދާއިރާއިން މާސްޓާސް ޑިގްރީ ހާސިލް ކުރައްވާފައެވެ.  ލީޑިން ޓީޗަރެއްގެ ގޮތުގައި މަސައްކަތްކުރެއްވި ފަހުން އިސްކަންދަރު ސްކޫލްގެ ޑެޕިއުޓީ ޕްރިންސިޕަލްގެ މަގާމު ވެސް އަދާކުރައްވާފައިވެ އެވެ. އަދި ޕާޓްޓައިމް ލެކްޗަރާއެއްގެ ގޮތުގައި މޯލްޑިވްސް ނޭޝަނަލް ޔުނިވާސިޓީގައިވެސް ކިޔަވައިދެއްވި އެވެ.