ޖުމްހޫރީ ޕާޓީގެ ލިޑަރ ޤާސިމް އިބްރާހީމް ވިޔަފާރިކުރެއްވީ އަމިއްލަ ފައިދާއަށްވުރެ ބޮޑަށް ގައުމަށް ކުރިއެރުން ހޯދާދިނުމުގެ މަގްސަދުގައި ކަމަށް ނިޝާން އިއްޒުންދީންގެ އިއްޒަތުގެ ވެރިޔާ އިލްޔާސް އިބްރާހީމް ވިދާޅުވެއްޖެއެވެ. 

އިލްޔާސް މިފަދައިން ވިދާޅުވީ ރޭ ޤާސިމްގެ އޮޓޯބަޔޮގްރަފީ ނެރުމަށް ބޭއްވި ހާއްސަ ހަފްލާގައި ވާހަކަދައްކަވަމުންނެވެ. 

މި ހަފްލާގައި ވާހަކަދައްކަވަމުން އިލްޔާސް ވިދާޅުވީ ޤާސިމްގެ މަސައްކަތުން ދިވެހިރާއްޖެއަށް ފައިދާހުރި ކަންތައްތަކެއް ލިބެމުންދިޔަ ކަމަށެވެ.

ޖުމްހޫރީ ޕާޓީގެ ލިޑަރ ޤާސިމް އިބްރާހީމްގެ އޮޓޯބަޔޮގްރަފީ ނެރުއްވުމުގެ ހަފްލާ--ފޮޓޯ: ވޮއިސް

އިލްޔާސް ވިދާޅުވިގޮތުގައި ބައެއް ފަރާތްތަކުން ޤާސިމްގެ މަސައްކަތަކީ އަމިއްލަ ފައިދާއަށް އެކަނި ކުރެއްވި މަސައްކަތެއްގެ ގޮތުގައި ބެލިޔަސް ޤާސިމްގެ މަސައްކަތަކީ އަމިއްލަ ފައިދާއަށް ކުރާ މަސައްކަތެއްގެ ގޮތުގައި އޭނާ ދެކިވަޑައިނުގަންނަވާ ކަމަށެވެ. ޤާސިމް މަސައްކަތްކުރެއްވީ ދިވެހި ގައުމާއި ރައްޔިތުންނަށްޓަކައި ކަމަށް އިލްޔާސް ވިދާޅުވެފައި ވެއެވެ.

ޤާސިމްގެ ހަޔާތްޕުޅުގެ މައްޗަށް ބިނާކޮށް ލިޔެފައިވާ މިފޮތް ނެރެދެއްވީ، މިކަމަށްޓަކައި ބޭއްވި ޙާއްސަ ހަފްލާއެއްގައި ނިޝާން އިއްޒުންދީންގެ އިއްޒަތުގެ ވެރިޔާ އިލްޔާސް އިބްރާޙީމެވެ. މި ފޮތުގައި ޤާސިމް އިބްރާހީމްގެ ޙަޔާތުގެ ތަޖުރިބާއާއި ޢިބްރަތްތައް ހިމެނޭއިރު، 800 ސަފްހާގެ މި ފޮތުގައި ޤާސިމްގެ ހަޔާތްޕުޅުގައި ހިނގާދިޔަ ފާހަގަކޮށްލެވޭ މުހިއްމު ވާހަކަތައް ހިމެނެއެވެ.

މި ފޮތުގައި ޤާސިމް އުފަންވުމާއި، ތުއްޕުޅުއިރުގައި މަންމާފުޅު އަވަހާރަވުމާއި ގުޅިގެން ދެން ދިރިއުޅުއްވަން ޖެހުނުގޮތާއި މާލެ އައުމަށްފަހު ދިރިއުޅުމުގައި އަމިއްލަފައިމައްޗަށް ތެދުވުމަށް ކުރެއްވި ދަތުރުގައި ކުރިމަތިވެވަޑައިގެންނެވި ތަޖުރިބާތައް ގެނެސްދީފައި ވެއެވެ. މީގެ އިތުރުން މި ފޮތުގައި ޤާސިމް އަމިއްލަ ވިޔަފާރި ފެށުނުގޮތާއި، ވިޔަފާރީގެ ކާމިޔާބީއާއި، މުޖުތަމައުއަށް ކޮށްދެއްވަމުން ގެންދަވާ ހިދުމަތްތަކުގެ އިތުރުން ޤާސިމްގެ ސިޔާސީހަޔާތްޕުޅުގެ ވާހަކަތައްވެސް ވަނީ ގެނެސްދީފައެވެ. މި ފޮތުގެ މުޞައްނިފަކީ ކުޅަދާނަ ލިޔުންތެރިޔާ މުޙައްމަދު ޖަމީލެވެ.