ރާއްޖޭގެ މާލީހާލަތު ރަނގަޅުކުރާނޭކަމަށް ސަރުކާރުން ވައުދުވިނަމަވެސް، އަދި މިހާތަނަށް އެފަދަ އެއްވެސް ކަމެއް ކުރާތީ ނުފެންނަކަމަށް އެމްޑީޕީ ސަރުކާރުގެ މާލީ ވަޒީރު އިބްރާހީމް އަމީރު ވިދާޅުވެއްޖެއެވެ.

ސަރުކާރުގެ މާލީ ކަންކަން ހިނގަމުންދާ ގޮތާ ގުޅޭގޮތުން އިދިކޮޅު އެންމެބޮޑު ޕާޓީ، އެމްޑީޕީން މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަދައްކަވަމުން އަމީރު ވިދާޅުވީ މި ސަރުކާރު ވެރިކަމަށް އައީ ރާއްޖޭގެ މާލީ ހާލަތު އަނދަވަޅަކަށް ވެއްޓިފައިވާކަމަށްބުނެ، މާލީ ހާލަތު ރަނގަޅުކުރުމުގެ ވައުދުތަކާ އެކުގައިކަމަށެވެ. މިގޮތުން ރައްޔިތުންނަށް ދެމުންދާ ސަބްސިޓީތައް މުރާޖައާކޮށް ސަބްސިޑީ އޭގެ ހައްޤުވެރިންނަށް ދިނުމާއި، ދައުލަތުގެ ބައިތުލްމާލަށް ނުލިބިވާ ފައިސާ ހޯދުމާއި، ސަރުކާރުގެ ހަރަދުތައް ކުޑަކުރުމަކީ މި ސަރުކާރުން ރާއްޖޭގެ މާލީ ހާލަތު ރަނގަޅުކުރުމަށް ވީ ވައުދުތައްކަމަށް އަމީރު ފާހަގަކުރެއްވިއެވެ.

އަމީރު ވިދާޅުވީ  އާސަންދަ އާއި ސަބްސިޑީ މުރާޖައާ ކުރާނޭކަމަށް ބުނިނމަވެސް މިހާރު ސަރުކާރުން ބުނަމުންދަނީ އެއްވެސް ރައްޔިތަކަށްދޭ ސަބްސިޑީ ނުކަނޑާނޭވާހަކަ ކަމަށް އަމީރު ވިދާޅުވިއެވެ. މީގެ އިތުރުން ސިޔާސީ މަޤާމުތައް މަދުކުރާނޭ ކަމަށް ބުނިނަމަވެސް ސިޔާސީ މަޤާމުތަކަށް މީހުން ނަގާ މިންވަރުވެސް ދަނީ އިތުރުވަމުންކަން އަމީރު ފާހަގަކުރެއްވިއެވެ. 

Advertisement

ދައުލަތަށް ނުލިބިވާ ފައިސާ ހޯދާނޭކަމަށް ބުނިނަމަވެސް ދައުލަތުގެ ޓެކްސް އިދާރާގެ ތަފާސްހިސާބުތަކުން ދައްކަނީ މަހަކަށްވުރެ މަހެއް ލިބެންޖެހޭ ފައިސާގެ އަދަުތައް އިތުރުވަމުންދާތަންކަމަށާއި، ސަރުކާރުގެ އަމަލުތައް ހުރިގޮތަށް ބަލައި މިކަންކަމުން ދޭހަވަނީ މާލީ ހާލަތު ރަނގަޅުކުރުމުގައި ސަރުކާރުގެ ޝައުގުވެރިކަން ނެތްކަންކަމަށް އަމީރު ވިދާޅުވިއެވެ.

އަމީރު ވިދާޅުވީ ސަރުކާރުން ރޯދަ އިނާޔަތުގެ ގޮތުގައި ކޮންމެ ގޭބިސީއަކަށް މަސްދަޅު ކޭހެއް ދޭގޮތަށް ނިންމިއިރު، އެކަމަށްވެސް ބަޖެޓްކޮށްފައި ނުވާކަމަށެވެ. އަދި ސަރުކާރުން ރޯދަމަހު ފެނާއި ކަރަންޓުން ޑިސްކައުންޓް ދޭން ބުނި ނަމަވެސް ބަޖެޓްގައި އެކަމަށްވެސް ފައިސާ ކަނޑައަޅާފައި ނުވާކަަމަށް އަމީރު ފާހަގަކުރެއްވިއެވެ.

އަމީރު ވިދާޅުވީ މާލީ ކަންކަމުގައި ސަރުކާރުން މިހާރު ގެންގުޅެމުންދާ ސިޔާސަތުތަކަށް ބަލާއިރު، މިއަހަރުގެ ފަހުކޮޅު 7 ބިލިއަން ރުފިޔާގެ ސަޕްލިމަންޓަރީބަޖެޓެއް ހުށަހަޅަންޖެހޭ ހާލަތަށް ޤައުމުގެ ހާލަތު ދާނޭކަމަށާއި، އެހެން ވެއްޖެނަމަ އެއީ ސަރުކާރުން މިއަހަރު 7 ބިލިއަން ރުފިޔާ ސަލާމަތްކުރުމަށް ވީ ވައުދާ ހިލާފްވުންކަމަށް އަމީރު ފާހަގަކުރެއްވިއެވެ.