ވައިނުސާފުވާ މިންވަރުބަލައި، ކަމަށް ސަމާލުވެގެން އުޅުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފިއެވެ.
އެޗްޕީއޭއިން މިއަދު އެކްސްގައި ކުރި ޕޯސްޓެއްގައި ބުނީ، ވައި ސާފު މިންވަރު މިނިސްޓްރީ އޮފް ޓޫރިޒަމް އެންޑް އެންވަޔަރަމެންޓްގެ ލިންކް އިން ނުވަތަ IQAir Visual އެޕް މެދުވެރިކޮށް ވައި ނުސާފްވާ މިންވަރު ބަލާލެވޭނޭކަމަށެވެ. އެގޮތުން ވައި ނުސާފުވާ މިންވަރުން ބަލައިގެން ރައްކާތެރިކަމުގެ ފިޔަވަޅުތައް އަޅައިގެން އުޅުމަށް އެޗްޕީއޭއިން ވަނީ އިލްތިމާސްކޮށްފައެވެ.
މެދުމިންގަނޑަށް ވައިނުސާފުވެއްޖެނަމަ ނޭވާލާ ނިޒާމުގެ މައްސަލަތައް ޖެހުމުގެ ފުރުސަތު ބޮޑުކަން ފާހަގަކުރަމުން އެޗްޕީއޭއިން ބުނީ، މި ހާލަތަށް ވައިނުސާފުވެއްޖެނަމަ ނާޒުކު ހާލަތުގައިވާ ފަރާތްތަކުން ބޭރަށްނިކުމެ އުޅުމުން ދުރުވާން ޖެހޭކަމަށެވެ. މީގެ އިތުރުން ނޭވާލާ ނިޒާމުގެ މައްސަލަތައް ހުންނަ މީހުން ބޭރަށްނިކުމެ ކަސްރަތުކުރުމާއި ކުޅިވަރުކުޅުން ފަދަ ކަންކަން މަޑުޖައްސާލަން ޖެހެއެވެ.
އަދި ނޭވާލާ ނިޒާމުގެ މައްސަލަ ހުންނަ މީހުން ގެއިން ބޭރަށް ނިކުމެ އުޅުމުގައި މާސްކު އަޅައިގެން އުޅުމަށް އެޗްޕީއޭއިން އެދެއެވެ.
މިއަދު މާލެ ސަރަހައްދުގެ ވައިނުސާފު މިންގަނޑު ހުރީ 115 ގައެވެ. އެއީ މެދު މިންގަނޑެވެ. އެޗްޕީއޭއިން ވަނީ މި ހާލަތުގައި ބޭރުގެ ނުސާފު ވައި ގޭތެރެއަށް ނުވަންނާނެހެން ގޭގެ ދޮުތައް ލައްޕައި އަދި އެއަރ ޕިއުރިފަޔަރ ބޭނުންކުރުމަށް ސަމާލުކަން ދިނުމަށް އެދިފައެވެ.
Advertisement
This content is created and paid for by advertisers and does not involve Voice Journalists
