ދައުލަތުގެ ޓެކްސް އިދާރާ މޯލްޑިވްސް އިންލަންޑް ރެވެނިއު އޮތޯރިޓީ، މީރާއަށް ހުސްވި ޖެނުއަރީމަހު ޓެކްސްގެ ގޮތުގައި 3.34 ބިލިއަން ރުފިޔާ ބަލައިގަނެފައިވާކަމަށް އެ އިދާރައިން ބުނެފިއެވެ.

މީރާއިން ނެރެ އާއްމުކޮށްފައިވާ ޖެނުއަރީމަހު އެއިދާރާއަށް ބަލައިގަތް ޓެކްސް އާމްދަނީއަށް ބަލާއިރު، އެމަހުގެ ތެރޭގައި 3.34 ބިލިއަން ރުފިޔާ ބަލައިގަނެފައިވާއިރު، އެއީ އެމަހުގެ ތެރޭގައި ލިބޭނޭކަމަށް އަންދާޒާކުރި އަދަދަށްވުރެ 5 އިންސައްތަ އިތުރުވުމެކެވެ.

މީރާއިން ބުނީ ޖެނުއަރީމަހު ބަލައިގަން ފައިސާގެ އަދަދު އިތުރުވުމުގެ މައިގަނޑު ސަބަބުތަކުގެ ތެރޭގައި ހިމެނެނީ، އާއްމު ޖީއެސްޓީއާއި ޓޫރިޒަމް ޖީއެސްޓީގެ ގޮތުގައި ލިބުނު އަދަދު އިތުރުވުމުންނެވެ. އަދި އެއާޕޯޓް ޓެކްސް އިން ނަގާ ރޭޓް އިތުރުވުމަކީވެސް ޖެނުއަރީމަހު ޓެކްސްގެ ގޮތުގައި އާމްދަނީ ލިބުނު އަދަދު އިތުރުވުން ހިމެނެެވެ. މީގެ އިތުރުން އިންކަމްޓެކްސް ދެއްކުމުގެ ސުންގަޑި ފެބުރުއަރީމަހުގެ ދެވަނަ ދުވަހަށް އިތުރުކުރުމަކީވެސް ޖެނުއަރީމަހު މީރާއަށް ބަލައިގަތް އާމްދަނީ އިތުރުވުމުގެ މައިގަނޑު ސަބަބެކެވެ.

- ޖީއެސްޓީން: 530.3 މިލިއަން ރުފިޔާ

- ޓޫރިޒަމް ޖީއެސްޓީން: 1.06 ބިލިއަން ރުފިޔާ

- އިންކަމްޓެކްސް: 1.2 ބިލިއަން ރުފިޔާ

- އެއާޕޯޓް ޑިވެލޮޕްމަންޓްފީ: 115 މިލިއަން ރުފިޔާ

- ޑިޕާޗާޓެކްސް: 113 މިލިއަން ރުފިޔާ

ދައުލަތުގެ ޓެކްސް އިދާރާއަށް މިދިޔަމަހު ޑޮލަރުން ބަލައިގަތް އާމްދަނީ އުޅެނީ 125.5 މިލިއަން ޑޮލަރުގައެވެ. މީރާއަށް އެންމެގިނައިން ޑޮލަރުން އާމްދަނީ ބަލައިގަނެފައިވަނީ، ޓޫރިޒަމް ޖީއެސްޓީގެ ގޮތުގައި ލުބުނު 69.1 މިލިއަން ޑޮލަރާއި، ކުންފުނިތަކުން އިންކަމް ޓެކްސްގެ ގޮތުގައި ދެއްކި 21.3 މިލިއަން ޑޮލަރެވެ.