އަލް އަސްރު ޖަމްޢިއްޔާއާއި ދާރިސް ޓީވީއާ ދެމެދު އެ ޖަމްޢިއްޔާގެ ކޮންޓެންޓް ދާރިސް ޓީވީން ދެއްކުމަށް އެއްބަސްވުމެއްގައި ސޮއިކޮށްފިއެވެ.

އެއްބަސްވުމުގައި އަލް އަސްރުގެ ފަރާތުން ސޮއިކުރެއްވީ ޖަމްޢިއްޔާގެ މީޑިއާ ކޯޑިނޭޓަރ އަކުރަމް ޢަބްދުލްޣަނީ އެވެ. އަދި ދާރިސް ޓީވީގެ ފަރާތުން ސޮއިކުރެއްވީ ހަސަން އަޒުމާނެވެ.

މި އެއްބަސްވުމުގެ މައިގަނޑު މަޤްޞަދަކީ ދިވެހި މުޖުތަމަޢުއަށް ފައިދާހުރި، އިސްލާމީ މަޢުލޫމާތު ފުޅާ ދާއިރާއެއްގައި ފޯރުކޮށްދިނުމެވެ. މި އެއްބަސްވުމުގެ ސަބަބުން އަލް އަސްރުގެ ކޮންޓެންޓް އިތުރު ފަރާތްތަކަކަށް ފޯރުކޮށްދެވި، ދާރިސް ޓީވީގެ ޕްރޮގްރާމްތައް އިތުރަށް ފުރިހަމަވެގެންދާނެ ކަމަށް ބެލެވެއެވެ.

Advertisement

މި އެއްބަސްވުމުގެ ދަށުން އަލް އަސްރުން އުފައްދާ ހުރިހާ ބާވަތެއްގެ ކޮންޓެންޓެއް ދާރިސް ޓީވީން ދުރަށް ދެއްކުމަށް ވަނީ އެއްބަސްވެފައެވެ.

އަލް އަސްރުގެ ނައިބު ރައީސް ރާމިޒް އަބޫބަކުރު ވިދާޅުވީ މި އެއްބަސްވުމަކީ ދެ ފަރާތަށްވެސް ވަރަށް މުހިންމު އެއްބަސްވުމެއް ކަމަށެވެ.

"މި އެއްބަސްވުމުގެ ސަބަބުން އަޅުގަނޑުމެންގެ މަސައްކަތް އިތުރު ބަޔަކަށް ފޯރުކޮށްދެވި، ދީނީ މަޢުލޫމާތު ފެތުރުމަށް އިތުރު ފުރުޞަތުތަކެއް ލިބިގެންދާނެ," ރާމިޒް ވިދާޅުވިއެވެ.

މި އެއްބަސްވުމުގެ ދަށުން ދެ ފަރާތުން ކުރިއަށް އޮތް ތަނުގައި އިތުރު ގިނަ މަސައްކަތްތަކެއް ކުރިއަށް ގެންދިއުމަށް ވަނީ ރޭވިފައެވެ.